Сумар дня на 19. грудня/децембра 2019 р.

Приносиме вам сумар медияльной ґрупы ЛЕМ.фм+ на ден 19. грудня/децембра 2019 р.

Василь Турок-Гетеш в нашій памяти

Словацкій Нацийональный Музей – Музей Русиньской Культуры в Пряшові просит уж в новым році, 9. січня/януара, на споминовый вечер про Василя Турока-Гетеша. Подія зачне ся в музейных просторах о 17.00 год. Орґанізувана єст в звязку з 80. річницьом народин єдной з найвызначнійшых осіб русиньского возроджыня на Словациі і возроджыня загальні, котре проходило на зламі 80. і 90. років ХХ ст. Музей в запрошыню пише про Турока-Гетеша як про драматурґа театру і драматурґа русиньского возроджыня. Прислужыл ся своім жытьом як раз тым двом сферам діяльности. Споминати на вызначного діяча придут артисты, журналисты і представникы русиньского руху, котры вєдно з ним будували русиньску еманципацийну дорогу до полной незалежности і підметовости.

Авторска стріча з Антоні Крогом

О тыжден, 19. грудня/децембра, в Малопольскым Центрі Культуры «Сокіл» в Новым Санчы пройде о 17.00 год. авторска стріча з етноґрафом і писменником Антоні Крогом. Запрезентує він свою нову книжку під наголовком «Поворот на Сандеччыну». Крог історию Сандеччыны описує простым языком, котрый притігат увагу чытача. В публикациі находят ся описы істориі того реґіону з ріжных єй періодів. Представлены сут політичны завіруваня, але так само автор зосереджат ся і на інчых сферах, прим. на культурі і кумшті. Антоні Крог спадковину Сандеччыны вказує на фоні історичных подій цілой Польщы. Што основне, дотепершіні публикациі нт. того реґіону вычысляли лем польскы діі. Крог, як популяризатор істориі ріжных меншын, представлят і історию Сандеччыны з перспективы Лемків, Жыдів і Німців. Пише, што Сандеччына, або як ю звали Лемкы – Сандецка Русь, столітями была вельокультуровым реґіоном. Попередньом книжком Крога было оповіданя про Лемків. «За тамтом гором» то опис особистых стріч з лемківском меншыном. Нову публикацию під назвом «Поворот на Сандеччыну» буде мож придбати на реченій стрічы.

Нова платня Штефана Штеця

Русиньскій естрадный співак, Штефан Штец, перед даякым часом выпустил свою другу сольову платню. Подібні як при дебютантскым кружку, котрый явил ся ярю 2018 р., і тота платня такой выключно являт ся русиньском. На платни находит ся 16 творів. Каждый з них єст при інтересуючій музичній аранжациі. Чути мож заєдно народны і авторскы співанкы. Серед них єст і авторска лемківска пісня «Під облачком», до котрой слова написал Семан Мадзелян, а музику обробил Ярослав Трохановскій. Як бесідує сам артиста, тота платня є дакус модернійша од попередньой.

Модернізация доріг на словацко-украіньскым пограничу

Справа і утримуваня дoріг Пряшівского Самосправного Краю зреконструує вісем кілометрів дорогы медже селами Стащын і Улич Сниньского Окресу, коло границ з Украіном. Модернізация пройде тіж по украіньскій страні. Ремонт буде проведеный з еврофондів в рамках черезграничного проєкту. Модернізувана буде част дорогы медже Пряшівскым Самосправным Крайом і Закарпатском Областю Украіны. По словацкій страні буде ремонтувана дорога долгости більше як 8 кілометрів, котра веде до граничного переходу Убля – Малый Березный. В рамках той трасы оправлены будут два мосты. По украіньскій страні модернізувана буде дорога од границі по припоіня на дорогу H13 в части Малый Березный – Дубриничы. Іде о 11,5 кілометра дорогы і єден міст. Цілковитый кошт проєкту то 4,38 млн евро.