Сумар дня на 18. вересня/септембра 2024 р.

Приносиме вам сумар медияльной ґрупы ЛЕМ.фм+ на ден 18. вересня/септембра 2024 р.

Конференция пн. «Талергоф. Першый лаґєр інтернуваня в Европі»

Стоваришыня «Руска Бурса» інформує, што 6. грудня/децембра тр. в Конференцийно-Выставенничым Осередку «Каштель» в Шымбарку одбуде ся наукова конференция пн. «Талергоф. Першый лаґєр інтернуваня в Европі». Цілю конференциі єст презентация і популяризация стану бадань, котры односят ся до обшыри звязаных з історийом і пізнійшым влияньом австийского лаґру інтернуваня в Талергофі, котрый діял од 1914 рока. Увязнено в ним парунадцет тисячів Русинів – в тым значучу част лемківской інтеліґенциі, інтернуваны были тіж Полякы, Румуны, Словакы, Жыды, Украінці, Ромове і Росияне. В конференциі прелеґентами будут експерты, котры репрезентуют ріжны науковы обшыри (істория, культурова антрополоґія, социйолоґія ци літературознавство). Конференция буде онляйново трансмітувана. Єй орґанізатором єст Стоваришыня «Руска Бурса» в Ґорлицях, а спілорґанізатором: Музей Дворы Карвациянів і Ґладышів в Ґорлицях. Конференция буде фінансувана з середків Державного Пляну Одбудовы з Проґраму Піпдераня Діяльности Підметів сектора культуры, креативных промыслів для стимулюваня іх розвитку.

Спільна Комісия Уряду та Нацийональных і Етнічных Меншын в кінци по засіданю

В минулым тыжни інформували сме, што проходила перша част LXXXIV засіданя Спільной Комісиі Уряду та Нацийональных і Етнічных Меншын. В понедільок 16. вересня/септембра прошла друга част того засіданя. Стріча тыкала нового реґуляміну признаваня дотаций на 2025 р. Як подає на своім фанпейджы Меншынова Страна Спільной Комісиі – «По долгых дебатах принято Реґулямін (…)». В найблизшых днях, по увглядніню выпрацуваных поправок буде опубликуваный на страні Міністерства Внутрішніх Справ і Адміністрациі і буде можливе складаня оферт на будучый рік. Через роботу над новым реґуляміном уж о найменше місяц пересунул ся термін складаня оферт, в порівнаню до минулых років. Од підпертя МВСіА залежыт діяльніст векшости меншыновых орґанізаций, якы діют для захованя і розвитку свойой культуры.

В Ораді і в Римі стрічы єпископів

Од 16. до 19. септембра/вересня тр. в румуньскій Ораді проходит 25. стріча східніх католицкых єпископів Европы. Того рока занимают ся темом плеканя братства медже єпископами і священниками. Проґрам зачал ся уж в понедільок стрічом єпископів з представниками власти міста, пак были выклады і спільна молитва. На стрічы бракує двох новорукоположеных єпископів: Высокопреосвященного Йоны Максима, пряшівского архієпископа і митрополиты, і владыкы Теодора Мацапулы, мукачівского єпархы. Іх неприсутніст в Румуніі звязана є з тым, же берут участ в тыжньовій стрічы новых єпископів Католицкой Церкви, яка проходит од 15. вересня/септембра в Римі. Під конец тыжньового проґраму вшыткых новых єпископів прийме на авдиєнициі Вселеньскій Архієрей – папа римскій Франциск.

Будут дві таблиці в Білій Воді

Фундация Забытый Світ з Явірок остал покровительом проєкту «Таблиці в Білій Воді» в рамках векшого: «Шляком волошской культуры через Білу Воду». Цілю проєкту є охорона культурной спадковины Шляхтівской Русы, особливо в рейоні Білой Воды. В рамках ініциятивы будут зроблены дві таблиці о істориі і культурі дваных мешканців Білой Воды. Єдна буде поміщена при початку села, друга в середині долины. Торжественне одкрытя таблиц пройде 19. жолтня/октобра при участи русиньского ансамблю Майдан Литмановой. Головным орґанізатор проєкту єст Неформальна Ґрупа Карпатской Локальной Ініциятивы, а авторком проєкту др Юстина Чонстка-Клапита з Ягайлоньского Університету.