Сумар дня на 18. серпня/авґуста 2023 р.

Приносиме вам сумар медияльной ґрупы ЛЕМ.фм+ на ден 18. серпня/авґуста 2023 р.

Тырват Світовый Конґрес Русинів

В Новым Саді в Сербіі тырват XVII Світовый Конґрес Русинів. Проґрам про делеґатів і гостів конґресу є поділеный на три дни. Вчера на прибывшых делеґатів русиньскых орґанізаций ждал культурный проґрам. За Лемковину на Конґрес пришли делеґаты од Стоваришыня Лемків і як гості делеґаты Стоваришыня «Руска Бурса» в Ґорлицях. На тогорічным СКР присутны сут і нашы редакторы, котры будут вам давати реляциі з конґресовых подій. Днес і заран буде проходил головный проґрам, в рамках котрого одбудут ся три пленарны засіданя. В проґрамі на днес єст м.ін. святочне одкрытя Конґресу та выголошыня лавреатів Преміі Василя Турока-Гетеша i Нацийональной преміі за русиньскє уменя імени Івана Манайла Pro Arte Ruthenorum. Так само днес проходит 1. пленарне засіданя і роботы в окремых комісиях СКР, і засіданя ХІ Світового Форуму Русиньской Молодежы. Наступна в проґрамі єст Медженародна науково-фахова конференция Світова русиністка днес і в будучности. Не забракне культурного проґраму, в виді театральной пєсы в русиньскым языку. Заран, в послідній ден конґресу пройдут два дальшы засіданя, перше підсумовуюче роботу комісий і ціли на будучы рокы. Дальше будут выборы членів Світовой Рады Русинів і председы Конґресу, як і голосуваня за принятьом резолюциі XVII Світового Конґресу Русинів. Пак продолжал буде культурный проґрам в Рускым Керестурі.

Торжества на св. Горі Ґрабарці

Православны вірны з цілой Польщы фурт ідут в поломництвах на св. Гору Ґрабарку, де будут разом празднувати свято Преображыня Господнього. Каждого рока торжество притігат десяткы тисячы поломників, вірных і гости. Традицийно присутны сут вшыткы єрархы Польской Автокефальной Православной Церкви. Святочны подіі проходят на святій горі од вчерашнього вечера. Днес по привитаню єрархів будут проходити вечырні богослужыня і панахіда. Заран, в ден свята, будут служены 4 літургіі – перша о 1.00 в ночы. Каждого рока три першы літургіі співают інчы хоры, в попередніх роках нічну службу співал і лемківскій хор православной парохіі в Креници. Головна літургія зачне ся о год. 9.30. Традицийно буде она трансмітувана нажыво в державній телевізиі. Як все співал буде мужскій хор студентів Православной Семінариі і Християньской Теолоґічной Академіі в Варшаві. Торжества завершыт крестный ход і посвячыня овоців.

Завершеный ремонт деревяной церкви в Білцаревій

Як поінформувала римокатолцка парохія в Білцаревій, завершыли ремонт святыні – в його рамках были чыщены і імпреґнуваны ґонты на зовнішніх стінах і огороджыню. Цілковитый кошт ремонту то близко 100 тис. злотых, котрый праві в цілости покрыли дофінансуваня з Міністерства Культуры і Нацийональной Спадковины, Повітового Староства в Новым Санчы і Уряду Ґміны Ґрибів. Церков в Білцаревій была побудувана в 1760 р. Перед выгнаньом, в ріжных періодах, молили ся в ній грекокатолицкы і православны вірны.

”Карпаты. Горы Культуры”

Бєщадскій Народный Університет просит на подію пн ”Карпаты. Горы Культуры”, котра одбуде ся в тот вікенд 19-20. серпня/авґуста в Музею Народного Будівництва – Саноцкым Скансені. В проґрамі сут чысленны выклады на карпатскы темы, примірно про карпатскы етносы, танці, природу і архітектуру. Окрем того заплянуваны сут концерты ґруп ”Лем мы”, ”Вернигора”, ”Бальовє” і ”Капеля Збєрана”. Польный проґрам найдете на фейсбуковым сайті Бєщадского Народного Університету.

«Стрічы з лемківском культуром»

Припоминаме, што заран, в суботу 19. серпня/авґуста в Ґожові Великопольскым одбудут ся «Стрічы з лемківском культуром». Подія, котра пройде в рамках циклю культурных імпрез «Добрый вечер Ґожів», зачне ся о 19.00 год. на сцені на Старым Рынку. В проґрамі заплянуваны выступы ЛАПіТ «Ластівочка» з Пшемкова і ґрупы Ефір і Надія. На подію просят члены Кружка Стоваришыня Лемків в Ґожові Великопольскым і його ведучый Іван Ґаборек.