Сумар дня на 18. серпня/авґуста 2021 р.

Приносиме вам сумар медияльной ґрупы ЛЕМ.фм+ на ден 18. серпня/авґуста 2021 р.

Лісы уж не до одзысканя

В суботу, 14. серпня/авґуста, президент Польщы Анджей Дуда підписал голосну новелизацию Кодексу адміністрацийного поступуваня, што ся односит до можливости квестийонувати важніст адміністрацийных рішынь звязаных м.ін. з поступуванями тыкаючыма одзыскуваня лемківскых лісів. Новелизация была опубликувана в Деннику Устав в понедільок, 16. серпня/авґуста. Для Лемків означат тото, же вшыткы справы, котры выселены в акциі «Вісла» і іх потомны зачали перед принятьом новелизациі, а якы не закінчыли ся до входу новых розвязань до правного порядку, будут підданы ремісиі і нияк не будут закінчены. Приняте розвязаня єст явні сперечне з принципом неретроакциі права. В наслідстві того не буде можливости старати ся о одзысканя маітельскых прав до лісовых ділянок ци жадати прав одшкодуваня од польской державы. Єдиным розвязаньом буде скаржыти польску державу до европейскых судів.

Членкыня КНіЕМ з візитом в Рускій Бурсі

В минулу суботу, 14. серпня/авґуста, в бурсі в Ґорлицях гостила Генрика Кшывонос-Стрихарска, посланкыня на Сойм, членкыня соймовой Комісиі Нацийональных і Етнічных Меншын, але предовшыткым – героіня серпньовых подій 1980 рока, котры причынили ся до падіня комунізму в Польщы і введіня демократичного порядку. Посланкыня выказувала заінтересуваня історийом Лемків, особливі в контексті вертаня выселеных Лемків на Лемковину і одзыскуваня маєтків, в тым лісів. Познала історию Руской Бурсы, обшыри діяльности орґанізациі, а тіж прислухувала ся пробі ансамблю Терочка, што особливі єй зворушыло. Генрика Кшывонос-Стрихарска была запрошена на концерт з нагоды 30-літя реактивациі Стоваришыня, што приняла з заінтересуваньом, і выразила охоту участи. Концерт одбуде ся 9. вересня/септембра на ґорлицкым рынку о 16.00 год.

Был спів, танец, поезия і не лем

Так само в суботу, але уж в Ужгороді прошла ювілейна, 20. едиция Фестівалю Русиньской Культуры Червена Ружа, орґанізатором котрой была Народна Рада Русинів Закарпатя. Юбілейна Червена Ружа привитала множество выступуючых, котры одпрезентували спів, танец і поезию. Публику чекал богатый тригодинный проґрам. Во вступным слові Євген Жупан, ведучый НРРЗ, бесідувал м.ін. о продолжаных старанях вызнати Русинів украіньском державом, особливі в контексті зближаючой ся 30. річниці незалежности Украіны. Спомнул так само на Русинів, якы одышли минулого рока. На фестівали был фольклор, але і модернійша музика, мож было видіти зачынаючых артистів і бардів русиньской культуры на Підкарпатю.

Высова запахне зільом

Уж в тот вікенд, 21.-22. серпня/авґуста, в Высовій пройде чергова подія пн. «Высова пахнуча зільом 2021». В проґрамі традицийні прелекциі про розмаіте зіля, зілярскы ци зілярско-косметичны варштаты, анімациі для діти і выступы артистичных і народных ансамблів. Запрезентує ся м.ін. наймолодша ґрупа ансамблю Терочка. В рамках пікніку пройде іщы конкурс на вінок з зіля, розложены будут і стоіска з реґіональныма выробами.