Сумар дня на 18. серпня/авґуста 2020 р.

Приносиме вам сумар медияльной ґрупы ЛЕМ.фм+ на ден 18. серпня/авґуста 2020 р.

Неодолга 7. річник Літературного Конкурсу Мариі Мальцовской

Oд 2. вересня/септембра до 13. листопада/новембра 2020 р. Сполок Русиньскых Писателів Словациі в спілпрацы з Академійом Русиньской Культуры в Словацкій Республиці і Інститутом Русиньского Языка і Культуры Пряшівского Університету в Пряшові выголосыл 7. річник Літературного Конкурсу Мариі Мальцовской на найліпшы творы в области поезиі, прозы, есеів і драмы в літературным русиньскым языку. Ориґінальны літературны творы в обсягу од 10 до 20 сторін тексту (дотепер николи непубликованы) можете посылати на адрес Інституту Русиньского Языка в Пряшові. Конкурз є анонімовый, то значыт, же каждый автор до коперты з літературным твором вложыт іщы єдну заліплену коперту, в якій буде його мено, назвиско, адрес i фотопортрет. Выголошыня результатів конкурсу одбуде ся зачатком грудня/децембра 2020 р. Найліпшы роботы, выбраны через жырі, будут оцінены і опубликуваны пак в часописі Русин.

Антилемківска заява Товариства Лемківщына

Всеукраіньскє Товариство Лемківщына выдало антилемківску заяву, в котрій пише, же ніт лемківского языка, а Лемкы то частина украіньского народу. Тота антилемківска постава то одповід на зложену до Президента Украіну петицию, жебы вызнати лемківскій як язык на державным рівни і надати му особливый статус в розуміню украіньскых законів. Особу, котра зложыла петицию, Товариство Лемківщына назвало провокатором, а саму ініциятиву окрислили як «ганебну». Товариство зажадало, жебы петиция была знята, а в інчым примірі особа, котра єй склала, буде почытувана за провокатора. Кєд петиция не буде выцофана, верхушка Товариства застерегла собі право до повідомліня одповідніх служб. Наше Стоваришыня Руска Бурса в Ґорлицях, як і ціла редакция ЛЕМ.фм согласно одлучат ся од антилемківской і антидемократичной поставы Товариства Лемківщына. Зазначаме, што незалежно од нацийональных поглядів, каждый чловек має право до свободы думаня, слова і власных переконань, бо тото вшытко єст основом демократичного світа, до котрого Украіна і єй громадяне так барз хотят долучыти.

Допомога грекокатолицкой пряшівской архієпархіі для Бейруту

Пряшівскій грекокатолицкій архієпископ і митрополита Йоан Бабяк по договорі з архієпископом Кірилом Васильом, апостольскым адміністратором кошыцкой грекокатолицкой єпархіі і владыком Петром Руснаком, братиславскым єпархом, выголосил на 30. серпня/авґуста позашорову збірку во вшыткых парохіях Грекокатолицкой Церкви sui iuris на Словациі. Збірка має іти на підпору східніх католицкых християн, котры сут траплены наслідками експлозиі в столици Лібану Бейруті. Дві експлозиі, котры мали місце 4. серпня/авґуста 2020 р., взяли жытя веце як 170 особам, тисяч люди было пораненых, а понад 300 тис. остало без стріхы над головом. Сила тиску експлозиі пошкодила пару катедральных соборів і храмы, а тіж знищыла три з пятьох великых шпыталів в Бейруті. Митрополита Бабяк передал свою солідарніст на рукы мельхітского патріархы Юссефа Абсі, котрого утвердил о своіх молитвах і близкости з його вірныма. Солідарніст выразил так само архієпископ Кірил Василь.

Нагороды Пряшівского Самосправного Краю

Пряшівскій Самосправный Край уж 17. раз уділит найвысше крайове оцініня. Вызначны особности і колективы з Пряшівского Краю можут быти пропонуваны до кінця вересня/септембра. Інформувала о тым Леа Геілова з одділіня комунікациі і пропаґациі Уряду. Пропозиці на нагороду про окремы особы ци колективы можут, окрем предсідателя і посланців Краю, предкладати і локальны самоуряды, орґанізациі, інституциі, та просто каждый, хто представит свою арґументацию. О лавреатах нагороды ПСК вырішыт крайове представництво на основі рекомандаций оцінюючой комісиі.