Сумар дня на 18. мая 2020 р.

Приносиме вам сумар медияльной ґрупы ЛЕМ.фм+ на ден 18. мая 2020 р.

Не будут діяти ізоляториі

В Креници не будут діяти ізоляториі. 14. мая т.р. малопольскій воєвода піднял офіцияльне рішыня зняти рекомендацию з дня 9. квітня/апріля 2020 р. в справі основаня ізоляториі під креницкым адресом при ул. Нітрібіта 4, направлену на Самодільный Публичный Заклад Здравотной Опікы ім. др. Юзефа Дітля в Креници. Згідні з 11. арт. 1. уст. уставы з 2. марця 2020 р. о специяльных розвязанях звязаных з превенцийом, протидіяньом і борбом з COVID–19, інчых заразных хворіт і выкликаных нима кризисовых ситуаций, воєвода може выдати рекомендациі, обовязуючы вшыткы орґаны локальной адміністрациі, діючы в воєвідстві, як і державны правны особы, орґаны територияльного самоуряду, самоурядовы правны особы і самоурядовы орґанізацийны єдиниці, якы не мают правной особовости в звязку з протидіяньом COVID–19. Офіцияльно рішыня было зняте зо взгляду на актуальне оцініня епідемічного стану на обшыри малопольского воєвідства.

До окресу Меджелабірці не пришла пандемія

”Найбарже русиньскій” окрес на Словациі остає єдиным без коронавіруса. Окрес Меджелабірці є подля середнього віку жытелів найстаршым в рамках Пряшівского самосправного краю і найменьшым што до кількости жытелів на Словациі. За остатнім переписом населіня з 2011 понад 60% населіня приголосило ся ґу русиньскій нацийональній меншыні. Станом на 14. мая т.р. в окресі Меджелабірці не явил ся ани єден припадок інфекциі новым типом коронавіруса. Окрес остає посліднім, єдиным на Словациі, де пандемія не пришла. Як повіли компетентны для денника Korzár, не є то доказ слабой міґрациі за роботом, або низкой кількости тестуваных. Процентово тестуваня в окресі є порівнювальне з інчыма окресами. Подля бургомайстра міста, сильны ограничыня в окресі не сут зменьшаны і вшытко є роблене так, жебы ани теоретично не могло дійти ґу тому, жебы ся новый коронавірус не пошырювал. Думат, же полегчыня ограничынь было бы великом хыбом. Подля міста, з чым ся згодит і Окресный уряд, абсенцию хвороты в окресі мож приписати одповідьному підходови жытелів.

Дороговы інвестициі в Креници

Інформуєме о новых дороговых інвестициях в ґміні Крениця. Ґміна достала промесу на ремонт ул. Солотвиньской в Креници. Квота 883 тисячы злотых з фонду самоурядовых доріг позволит выремонтувати такой 1000 метрів знищеной дорогы іщы в текучым році. Вырішеный был конкурс оферт на будову паркінґу при ул. Еберса. За квоту близко чверт мілийона злотых зроблят парудесят місц паркінґовых. Выремонтуваны сут уж початок улиці Пулаского од стороны Бульварів Дітля. Ремонтовы роботы были тіж ведены м.ін. на ул. Зьрудляній, Чорным Потоці, ци ул. Вєйскій. Плянуваны сут дальшы текучы ремонты, такы як ул. Домбровского, ул. Подґурна, ци част доріг в солецтвах. До хоснуваня оддано уж 200-метровый фраґмент тротуару в Бересті, якій спілфінансувало малопольскє воєвідство.

Маґурич в Волівци

Стоваришыня Маґурич просит вшыткых охочых підняти ся вольонтерской роботы на цмонтір в лемківскым Волівци. В днях 11.-14. червця/юнія хоче соспільні выремонтувати на цмонтери штырі знищены памятникы. Подія буде проходила так як попередні, то значыт орґанізатор забезпечыт вольонтерам ґратя, выжывліня і спаня. Стоваришыня Маґурич од вельох років занимат ся охороном перед загыбаньом розмаітых елементів сепульклярной штукы. Через рокы сохранило перед знищыньом м.ін. десяткы лемківскых цмонтерів, памятників, крестів. Кому лежыт на серци лемківска спадковина і хто має дакус свобідного часу і охоту до роботы, прошеный єст долучыти до акциі.