Сумар дня на 18. марця 2024 р.

Приносиме вам сумар медияльной ґрупы ЛЕМ.фм+ на ден 18. марця 2024 р.

Загальне зобраня Стоваришыня Руска Бурса в Ґорлицях

В минулу суботу 16. марця 2024 р. в Ґорлицях одбыло ся шторічне загальне зобраня членів Стоваришыня Руска Бурса, на якым была підсумувана діяльніст общества за влонишній рік, але і накрислены текучы і будучы проблемы, а тіж выбраны новы власти орґанізациі. Присутным бурсакам были представлены справописы (мериторичный, фінансовый і од Ревізийной Комісиі), а пак члены стоваришыня дали абсолюторию одходячому зарядови. Дальше, через голосуваня, члены стоваришыня за ведучу заряду Руской Бурсы на дальшу річну каденцию зас выбрали Наталию Малецку-Новак. Заряд дополнят: Олена Дуць, Павел Малецкій, Анна Масляна, Андрий Трохановскій і Даміян Трохановскій. На засіданю были порушены тіж актуальны справы і ведены проєкты, але і тото, што орґанізация плянує в близшым і дальшым часовым просторі. Перед загальным зобраньом прошла тіж в Рускій Бурсі технічно-орґанізацийна стріча членів редакциі радия і порталю ЛЕМ.фм.

Авторскы стрічы з Петром Медвідьом

Так само в суботу 16. марця прошла в Рускій Бурсі в Ґорлицях авторска стріча з Петром Медвідьом – як раз Стоваришыня «Руска Бурса» в Ґорлицях печатало осіню минулого рока дебютантску збірку поезиі нашого редакцийного камарата пн. «синьов країнов». Бесіду модерувал Петро Мурянка. Додатковом атракцийом была выстава монотипій, котры до книгы зробил Юрий Червеный. Тот, хто не был з нами в суботу, може взяти участ в черговій подіі в рамках промоциі книжкы, котра пройде заран, в віторок 19. марця, в просторах Словацкого Нацийонального Музею – Музею Русиньской Культуры в Пряшові. Не і бракне музичной розрывкы – на подію приде Петер Пеці Угер. Початок о 16.00 год. Книжку фурт мож іщы придбати, м.ін. в нашым інтернетовым склепі.

Ювілейный семінар карпаторусиністикы

В минулый четверь 14. марця одбыл ся ювілейный 60. семінар карпаторусиністікы, котрый орґанізує Інститут Русиньского Языка і Культуры Пряшівского Університету. З рефератом на тему «Ґу ґенезі еміґрантской літературы карпатскых Русинів в Зъєднаных Штатах Америкы» выступала докторантка русиньского інституту Домініка Новотна. Перед семінаром одбыла ся вырочна членьска громада Сполку русиньскых писателів Словациі. Громаду вела Кветослава Копорова, голова орґанізациі, котра пак традицийно вела і семінар карпаторусиністикы. На кінци подіі были одпрезентуваны найновшы публикациі карпаторусиністикы. Веце про подію найдете в дописі на нашым портали.

Одкрытя палацу в Сухій Ґурній

Як інформує ґміна Польковиці, в тоту неділю 24. марця пройде торжественне одкрытя одремонтуваного палацу в Сухій Ґурній. Окрем офіцияльного одкрытя палацу сут на тот ден заплянуваны: звиджаня обєкту з провідником, концерт, выставы ци показ лясерів з історичным акцентом. На участных ждут і многы варштаты – обовязуют на них скоршы записы. Будинком заряджат Центр Культуры в Польковицях. Стрічы і занятя проходили там уж од даякого часу, але фурт тырвало допосажыня поміщынь, зато палац аж тепер буде офіцияльно одкрытый. Як подал бургомайстер Польковиц Лукаш Пузнєцкій, «єст то особливый обєкт (…) з великом історийом, вказуючом, як богате минуле має польковицка земля. Што важне, то обєкт, котрый має ся стати місцьом стріч, інтеґрациі, будуваня спільноты в опертю о культуру, о дідовизну». Важным місцьом в палаци буде ізба памяти. Будут там вказувати памяткы передаваны жытелями реґіону.