Сумар дня на 18. листопада/новембра 2024 р.

Приносиме вам сумар медияльной ґрупы ЛЕМ.фм+ на ден 18. листопада/новембра 2024 р.

Святкуваня 100-літя автокефалиі Польской Православной Церкви в Президентскым Палаци в Варшаві

В четвер 14. листопада/новембра тр. Президент Польской Республикы Анджей Дуда з нагоды 100-літя автокефалиі Польской Автокефальной Православной Церкви принял в Президентскым Палаци в Варшаві представників Польской Православной Церкви. В стрічы взяли участ Митрополита Варшавскій і Цілой Польщы Сава, єпископат Православной Церкви в Польшы, духовенство зо вшыткых єпархій, монахы і монашкы, православы діячы. Президентови товаришыла його жена Аґата Корнгаузер-Дуда та міністер в Канцеляриі Президента ПР Войцєх Колярскій. З перемышльско-ґорлицкой єпархіі присутны были архієпископ Паісий, о. митр. Роман Дубец і о. митр. Володислав Канюк. З вроцлавско-щеціньской єпархіі брали участ в стрічы архієпископ Юрий, о. митр. Павел Стефановскій і о. протодіак. Мєчыслав Олеснєвич. Президент в своім выступліню спомнул на спільну історию і коеґзистенцию вшыткых громадян в державі, підкрислил вклад Польской Автокефальной Православной Церкви внесеный до добра Польской Республикы і єй істориі. Подякувал за будуваня постав, спільне будуваня Польщы і просил о дальшу вспілпрацу тым ділі.

Наукова конференция «Талергоф. Першый лаґєр інтернуваня в Европі»

Уж неодолга в рамках лемківскых упамятнінь 110. річниці інтернуваня Русинів одбуде ся наукова конференция пн. «Талергоф. Першый лаґєр інтернуваня в Европі», на котру просят Стоваришыня «Руска Бурса» в Ґорлицях та Музей Дворы Карвациянів і Ґладышів в Ґорлицях. Конференция одбуде ся в Каштели в Шымбарку в пятницю 6. грудня/децембра. Початок о год. 10.30. Конференция має на ціли не лем упамятнити жертвы Талергофу, але тіж выкликати шыршу рефлексию над історичныма механізмами, котры довели до переслідуваня. Проґрам обнимат три темовы панелі. В першым прелеґенты призрят ся ґенезі основаня лаґру на фоні нацийональной політикы Австро-Мадярской Монархіі. В другым панели омовлены будут досвідчыня Талергову з пізнійшыма польскыма лаґрами для поневоленых. Третій панель темово зосередит ся на формах упамятнінь жертв Талергофу і його присутности в русиньскых текстах культуры. Серед запрошеных гости находят ся выдатны бадачы і реґіоналисты, котры представлят ріжны аспекты драматичных подій звязаных з Талергофом і іх влияня на лемківску соспільніст і шыршый історичный контекст Серединно-Східньой Европы. Детальный проґрам конференциі найдете в дописі на нашым портали. Вступне на подію є дармо. Конференция буде тіж нажыво трансмітувана на каналі YouTube lem.fmTV.

Заінтересуваня лемківском опером перебільшыло очекуваня орґанізаторів

В найблизшу неділю 24. листопада/новембра в Нацийональным Форум Музикы во Вроцлаві одбуде ся премєра лемківской оперы «Голос». Як поінформували орґанізаторы, заінтересуваня опером перебільшыло іх очекуваня і білеты на оба спектаклі, котры одбудут ся того дня, выпродали ся в нецілых двадцет минут. Тоты, котрым не повело ся купити білету, а хотіли бы видіти оперу, правдоподібно будут іщы мати таку нагоду. В звязку з великым заінтересуваньом орґанізаторы працуют над тым, жебы неодолга оголосити дальшы даты концертів.

Джерело фотоґрафіі: Marek Borawski/KPRP