Сумар дня на 18. грудня/децембра 2024 р.

Приносиме вам сумар медияльной ґрупы ЛЕМ.фм+ на ден 18. грудня/децембра 2024 р.

Засіданя Спільной Комісиі Уряду та Нацийональных і Етнічных Меншын

Вчера проходило LXXXVI пленарне засіданя Спільной Комісиі Уряду та Нацийональных і Етнічных Меншын. Вчас посліднього тогорічного засіданя подано інформацию о плянуваній в проєкті буджету державы на 2025 рік высокости середків і іх розділіню на реализацию задач, котрых цілю є охорона, захованя і розвиток культурной достоменности нацийональных і етнічных меншын. Представникы Державной Рады Радийофоніі і Телевізиі, Рады Нацийональных Медий, директоры одділінь TVP справоздали присутніст меншын в публичных медиях. Представлено стан реализациі записів уставы в квестиі двоязычных таблиц, прошла тіж бесіда о місцях історичной памяти в діянях інституций державы. Окремым пунктом засіданя было выступліня представника ормяньской меншыны, якій бесідувал о Упамятнінях Ґеноциду Ормян в Польщы. Дальше представлено гармоноґрам роботы Комісиі на будучый рік і обесідувано празднуваня ювілею 20. річниці схваліня закону з 6. січня 2005 р. о нацийональных і етнічных меншынах та о реґіональным языку.

10 авдийоподкастів о Лемках з Лемками

Стоваришыня «Руска Бурса» в Ґорлицях реализує проєкт пн. «Лемківскы Оповісти: Мультікультурова Подорож через Сучасніст». То мультімедияльный проєкт, котрого цілю єст приближыти культуру, історию і сучасне жытя Лемків. В рамках сериі возникло 10 авдийоподкастів, в котрых почуєте бесіды з поетами, активістами, професорами, тлумачами, молодым поколіньом Лемків. За проєкт одповідат Сільвія Бруні, вроджена в Італиі теоретичка музикы, яка од 15 років мешкат в Польщы, а перед парома роками залюбила ся в лемківскій культурі. Єй стараньом минулого рока была печатана перша антолоґія лемківской поезиі в тлумачыню на італияньскій язык. Подкасты доступны будут в польскым языку з написами – по лемківскы, італияньскы і анґлицкы. Подкастам товаришыла буде інтерактивна мапа на сайті siliva.lem.fm. Проєкт «Лемківскы Оповісти: Мультікультурова Подорож через Сучасніст» фінансуваный єст Европейском Унійом NextGenerationEU.

Нагорода Пряшівского Самосправного Краю 2024 для Малопольского Воєвідства

В часі торжества в Театрі ім. Йонаша Заборского в Пряшові Віцемаршалок Малопольского Воєвідства Вітольд Козловскій одобрал з рук пряшівского жупана Міляна Маєрского Нагороду Пряшівского Самосправного Краю 2024. То нагорода признана для Малопольского Воєвідства, як доказ вдячности за долголітнє партнерство і спільны ініциятивы. Обі самоурядовы єдиниці од 20 років успішні реализуют спільны проєкты, в тым тоты, котры промуют туристику і культуру. Об реґіоны лучыт територияльна близкіст, а тіж культруна і языкова, што злегшат спілпрацу в творіню м.ін. спільных туристичных пути ци орґанізуваню культурных подій. Минулого рока самоуряд Малопольского Воєвідства передал мілийон золотых на поміч в одбудові по землетрясіню, котре прошло в Пряшівскым Краю. Нагороды Пряшівского Самосправного Краю признаваны сут од 20 років особам і інституциям, якы заслужыли ся для розвитку реґіону. Минулого рока лавретом было м.ін. Підкарпатскє Воєвідство, доцінен за заанґажуваня в розвиток трансграничной спілпрацы.

Оголошыня резльтатів Літературного Конкурсу Мариі Мальцовской

Сполок Русиньскых Писателів Словациі просит на презентацию лавреатів 11. едициі конкурсу о Літературну Нагороду Мариі Мальцовской. Оголошыня результатів одбуде ся уж в найблизшу пятницю о 10.00 год. в засідальни Consilium maius Ректорату Пряшіского Університету.