Сумар дня на 18. грудня/децембра 2023 р.

Приносиме вам сумар медияльной ґрупы ЛЕМ.фм+ на ден 18. грудня/децембра 2023 р.

Підкарпатскє воєвідство стало лавреатом Преміі Председы ПСК

В четверь 14. грудня/децембра на Великій сцені Театру Йонаша Заборского в Пряшові одбыла ся святочна церемонія уділіня Преміі Пряшівского Самосправного Краю за 2023 рік i Преміі Председы ПСК. Пряшівскій Край оддал так чест особностям і колективам, котры помогли розвиткови реґіону дома і заграницьом. Єдным з лавреатів Преміі Председы ПСК стал черезграничный партнер краю – Підкарпатскє Воєвідтво. Оба реґіоны спілпрацуют долгы рокы, м.ін. в рамках черезграничных інструментів Европейской Уніі, головно при проєктах в обшыри дороговой інфраструктуры, охороны природничой і культурной дідовизны, туристикы, освіты і середовиска.

Буджет ґміны Польковиці позитивно оціненый специялистами

В минулым тыжни інформували сме о працах над буджетом ґміны Польковиці і товаришучому тому напятю. Буджет зрыхтуваный бургомайстром неґативно оцінили товды польковицкы радны, з огляду на збільшаюче ся задолжыня ґміны. Як ся тепер вказало, Реґіональна Обрахункова Ізба во Вроцлаві позитивно оцінила три документы важны для ґміны Польковиці: проєкт буджету на будучый рік, і долучены проєкты – тыкаючы можливости сфінансуваня дефіциту і велолітньой фінансовой проґнозы. Опініі были выданы без уваг, а праца бургомайстра і урядників была оцінена специялистами барз высоко. Як мож чытати в документі: «З проєкту резолюциі в справі вельолітньой фінансовой проґнозы (…) выникат, же в роках 2024-2040 буде захованый принцип сплаты задолжыня (…)». На днес заплянувана єст стріча ведучого Містной Рады в Польковицях з бургомайстром Польковиц і урядниками в справі схваліня проєкту буджету ґміны на будучый рік.

Мож уж придбати нову «Бесіду»

Вышля чергова, остатня тогорічна «Бесіда», ч. 6 (195) за місяці листопад/груден. Тото святочно-новорічне чысло приносит нам традицийно «Календар Бесіды на 2024 рік». В новым часописі мож прочытати м.ін. творы учасників ХХХІ Лемківской Творчой Осени, ци выімок з Орвельовской «Звірячой Фармы», якой тлумачыня до лемківского языка зробил Петро Криницкій. Окрем того сут статіі м.ін. Петра Трохановского, Северияна Косовского, Петра Медвідя і Мирослава Воргача, новины з русиньского світа і урывкы з інчых часописів і ґазет, што тыкают нашых справ.

Ювілей ансамблю Капеля Древутня

В минулу пятницю, 15. грудня/децембра, в Студию ім. Будкы Суфлера люблиньского Польского Радия проходило свято ансамблю Капеля Древутня. То ювілей 25-літя од основаня той фольковой ґрупы, якой велика част репертуару то лемківскы пісні. Капеля Древутня єст барз добрі знана лемківскій публиці, не раз участвуючы на лемківскых фестівалях, напримір на тогорічній Лемківскій Ватрі в Михалові. По святочынм концерті для нашого радия пару речынь высловил єден з його членів і при тым основателів ансамблю, Пьотр Зюлек: «Сердечно витам вшыткых Лемків, котры нас чуют! Барз добрі ся нам грало, але Вас, дорогы Лемкы, дакус бракувало. Хоц, правда, была гев з нами невелика, але скуточна лемківска репрезентация. Повім так – боял єм ся того концерту, як мало коли, але самы оцінте, што з того вышло». Окрем вельох желань і ґратуляций, теперішні і бывшы члены ансамблю были нагороджены Медальом Президента Міста Люблина. Тішыме ся разом з Капельом Древутня і желаме ім соток дальшых нот заграных на домашніх і заграничных сценах, а при тым дальшых успіхів і наступных так достойных ювілеів.

І. Лемківскій Вертеп в Пшемкові

Вчера в Пшемкові одбыл ся І. Лемківскій Вертеп, орґанізуваный місцевым Кружком Стоваришыня Лемків. На концерті запрезентували ся ґаздове – Лемківскій Ансамбль Пісні і Танця Ластівочка та Дітячый Ансамбль Ластівчата, як і гості: хор Нобіс, Ярошівяне і Файна Ферайна зо Шпротавы. На подіі присутны были запрошены самоурядовці та православны священникы з Пшемкова, Любіна і Студзьонок. Кружок СЛ в Пшемкові плянує, жебы Лемківскій Вертеп был цикличном подійом, зато до стріы о рік!