Сумар дня на 18. червця/юнія 2021 р.

Приносиме вам сумар медияльной ґрупы ЛЕМ.фм+ на ден 18. червця/юнія 2021 р.

Председа Округлого Стола Русинів Словациі ґу закінчыню списуваня жытелів

На фейсбуковым фанпейджы Русины на Словациі явил ся текст председы Округлого Стола Русинів Словациі Петра Штефаняка ґу закінчыню списуваня жытелів. Як сме перше інформували, 13. червця/юнія закінчыло ся асистуване списуваня жытелів на Словациі, што ся зышло зо святкуваным гын товды Дньом Русинів. В писмі подякували вшыткым тым, котры при списуваню думали на тото, же русиньска нацийональніст єст частю іх достоменности і дополнює так розмаітіст Словациі. Вірят, же ґу русиньскій нацийональности ся приголосит векше чысло, як то было при остатнім списуваню десят років тому, понеже минула декада несла ся в позитивній енерґіі і неструдженій роботі представників інституций, самосправы, здружынь ци волонтерів. Завершыньом активности были кампаніі пн. Рік русиньского села, а головно фінальна кампанія Сме Русины, яка діяла онляйн і офляйн, наперек тырваючій пандеміі. Досягла она понад 200 тис. осіб за посередництвом социяльных сіти. На дорогах і в рухливых місцях было замонтуваных понад 110 більбордів і біґборд. До почтовых скринок трафило 60 тис. летучок, зрыхтувано плякаты, радийо- і відеоспоты, статі, активностями заполнено і социяльны сіти. В тексті підкрислили і великій і вызначный в істориі Русинів успіх, якым єст реализация социяльной кампаніі, до якой ся долучыли постепенно Русины в Польщы (Стоваришыня «Руска Бурса» в Ґорлицях і Стоваришыня Лемків), в Чешскій Республиці, Мадярах, Сербіі, Хорвациі і Румуниі. Схоснуваня єдной візуальной концепциі і слоґану вказало вагу спілпрацы Русинів жыючых в ріжных державах Европы.

Карпатска Стріча про ремонт дзвінниці в Полянах Суровичных

Карпатскє Товариство просит на шесту уж в тым році Карпатску Стрічу, яка пройде онляйн в четвер, 24. червця/юнія, о 19.00 годині. Тема стрічы то «Лекция покоры – значыт о 10 роках ремонту дзвінниці в Полянах Суровичных». О консервацийных і реконструкторскых працах при побудуваній в 1830 році дзвінници, о вчыню ся покоры і тым, же вартат ся піднимати амбітных задач, оповіст координатор цілого проєкту Вітольд Ґжесік. З огляду на пандемію, Карпатскы Стрічы проходят в тым році лем в формі вебінарів, в каждый послідній четвер місяця. Інформациі о стрічах і тым, як долучыти до них як участник на плятформі ZOOM, публикуваны сут на інтернетовым сайті karpaccy.pl в половині каждого місяця. Переносы зо стріч сут тіж удоступняны в сервісі Youtube на каналі Карпатского Товариства.

Спомніня Мучеників Холмской і Підляшской Землі в Святковій Великій

Як каждого рока, в другу суботу червця/юнія в Святковій Великій, на поляні близко придорожной капличкы, служена была св. Літургія з нагоды локального спомніня свв. Мучеників Холмской і Підляшской Землі, а особливо о. мученика Павла (Швайко) і мучениці імости Йоанны, якы перед тым як трафили на Холмщыну, несли послугу на Лемковині. При каплици, яка ся находит коло поляны, св. Павел Швайко правил богослужыня в меджевоєнным періоді для православных Лемків. Тепер літургію очелювал архієпископ перемышльско-ґорлицкій Паісий, в асисті духовенства Ґорлицкого, Креницкого і Саноцкого Деканатів.

Одкрытый Ден Реґіонального Продукту в Вапенным

В вікенд 26.-27. червця/юнія в Амфітеатрі в Вапенным одбуде ся Одкрытый Ден Реґіонального Продукту. В проґрамі м.ін. Локальна Біржа – презентация оферты підметів, якы оферуют локальны продукты, услугы і ініциятивы та презентация продуктів выріжненых Промоцийным Знаком КАРПАТІНҐ і Знаком Локальной Маркы Долина Карпа. В рамках презентациі продуктів одбуде ся тіж показ варіня, деґустациі ци варштаты ліпіня перогів. Додатково пройдут концерты, запрезентуют ся Кружкы Ґаздынь, будут анімациі для діти і родинный пікнік.