Сумар дня на 17. вересня/септембра 2021 р.

Приносиме вам сумар медияльной ґрупы ЛЕМ.фм+ на ден 17. вересня/септембра 2021 р.

Нацийональне Повселюдне Списуваня іщы лем до кінця вересня/септембра

Припоминаме, же іщы лем до кінця вересня/септембра 2021 рока потырват в Польщы Нацийональне Повселюдне Списуваня, а як вказуют статистикы дальше не списало ся 20% жытелів. Обовязок списати ся має каждый, хто постійні або часово прожыват на обшыри Польщы. Од початку квітня/апріля тр. списуваня проходит головно в інтернетовій формі, але мож ся тіж списати при помочы рахмайстрів. Згідні з досліджынями Головного Статистичного Уряду, найліпше зо списом порадили собі жытелі Опольщыны і Підкарпатя, найгірше на Мазовшы. Подібні єст на Нижнім Шлеску і в Малопольщы, де збераня списовых даных іде барз помалы. Вшыткы переданы в списі даны сут обняты статистичном таємницьом і сут анонімовы. Дакотры з чысел зобраных вчас тогорічного списуваня сут особливо важны для лемківской меншыны. Мож в ним м.ін. окрислити свою нацийональніст і хоснуваный язык, в тым окрему лемківску нацийональніст і лемківскій язык.

«Туристичны Скарбы Малопольщы» 

Тырват третя едиция конкурсу «Туристичны Скарбы Малопольщы». Його цілю єст нагородити найбарже атракцийны, новаторскы і приязны для туристів місця. Голосы мож оддати аж в 6-ох катеґориях: місце з климатом, найбарже інтересуючый туристичный пут, подія, унікатова туристична атракция, одпочынок на селі і в гостині. Подібні як рік тому, серед номінуваных до нагороды находит ся вельо місц з обшыри Лемковины, єст м.ін. Біч та Кромер Фестіваль, якій в ним ся одбыват, ци рекреацийно-туристична стежка над Климківком. Голосувати мож до 21. вересня/септембра на офіцийным сайті конкурсу.

В ґорлицкым парку зачали ся великы зміны

В тым тыжни зачал ся ремонт в ґорлицкым парку. На місци парковой кавярні, котра уж єст розобрана, побудуют солянкову інгаляторию. Вартіст інвестициі то коло 360 тис. злотых. І хоцкы іщы не знатя, хто буде одповідал за будову, то уж тепер Выділ Інвестициі і Розвитку Уряду Міста в Ґорлицях заповіл, же нова атракция буде готова до кінця того рока. Додатково в рамках Громадяньского Буджету рішено досвітлити вісячый міст, котрый веде до парку. Як повіла думкодавчыня выграного проєкту, так освітленый міст буде не лем барз ефективном атракцийом, але тіж барз добрі впише ся в госло Ґорлиц як Міста Світла.

75. річниця Парохіі Св. Миколая в Щеціні – святкуваня уж в тот вікенд 

Православна Церков в Щеціні просит на святкуваня 75. річниці Парохіі Св. Миколая та 10. річниці освячыня щеціньской церкви. З той нагоды заран, в суботу – 18. вересня/септембра, одслужена буде літургія, яку очелювал буде православный архієпископ вроцлавско-щеціньскій Юрий. Служба зачне ся о 10.00 год. в церкви св. Миколая. Додатково днес о 19.00 год. в храмі пройде концерт церковной музикы пн. «Вірны Традициі», што орґанізуваный єст православным стоваришыньом св. Миколая в Щеціні.