Сумар дня на 17. січня/януара 2023 р.

Приносиме вам сумар медияльной ґрупы ЛЕМ.фм+ на ден 17. січня/януара 2023 р.

Вытинка дерев в карпатскых лісах

Ініциятива Дикы Карпаты алярмує, што надлісництво Красічын заплянувало вытинку понад 260 дерев памятниковых вымірів, котры згідні з правом кваліфікуют ся до охороны. Як підкрислят орґанізация, сама вытинка такых дерев то уж велика втрата для карпатскых лісів і екосистему, додатково вызначена обшыр, де зачне ся вытинка, єст сідлиском беркутів. Згідні з досліджынями активістів на тій обшыри оселила ся пара тых птахів, але зо взгляду на діяльніст лісничых мусіли они найти нове місце на гніздо. Рахує ся, што в цілій Польщы єст лем 30 пар того ґатунку і такой вшыткы находят ся в Карпатах, жебы зробити гніздо потрібуют они місця зо старыма великыма деревами. Надлісництво вытинку арґументує фактом, што єст она згідна з пляном заґаздуваня ліса затвердженым Міністерством Середовиска. Подали тіж, што каждого рока незалежный орнітолоґ моніторує стан популяциі птахів, в тым беркутів, а згідні з остатніма досліджынями птахы сут в добрій кондициі, о чым свідчыт нове гніздо і побільшыня популяциі. Активісты розуміют вытинку дерев, залежыт ім єднак на сохраніню натурального характеру найстаршых части карпатскых лісів і респектуваня охороны обшыри Натура 2000 і ляндшафтного парку.

Наступный ремонт в Ґорлицях

Неодолга зачне ся ремонт ґорлицкого рынку. На тоту ціль місто отримало фінансову підпору з проґраму Польскій Лад в квоті близко 5 млн зл. В 2021 р. місто зреализувало ремонт верхньой верствы єдной з прилігаючых до рынку улиц, де вымінено кістку на асфальт, што не сподабало ся вшыткым жытелям Ґорлиц. Тепер подібны працы будут ведены на більшости уличок в центрі міста, єднак – як зазначают власти – ремонт дороговой інфраструктуры буде тыкал выміны ґранітовой кісткы на нову без покрываня асфальтом. Як передал бургомайстер Ґорлиц, більшіст плянів єст уж готова, місто жде іщы лем на допрацуваня проєкту улиці 3. мая, котра тіж буде обнята ремонтом. Кєд нич ся не змінит, неодолга місто буде могло оголосити конкурс оферт, жебы як найскорше зачати ремонт.

Автобусове получыня Нижньошлезской Желізниці

Нижньошлезска Желізниця хоче зачати обслугу получыня ревітализуваной леніі іщы перед закінчыньом плянуваных на ній прац, в місце потягів будут курсувати автобусы. Нижньошлезска Желізниця плянує пустити своі автобусы на трьох трасах: Сыців-Олесниця, Хоцянів-Ґлоґів, через Пшемків і Ґавожыці, та Ліґниця-Злоторыя-Єленя Гора. Як подал член заряду желізниці, спілка хоче опрацувати плян і запропонувати його реализацию локальным самоурядам. Додал тіж, што урухомліня автобусів на тых леніях дозволит опрацувати, кілько подорожуючых корыстат з леніі і в якых годинах єст найбільше запотрібуваня, што буде добром основом при плянуваню уж желізницьовых получынь по закінчыню ревітализациі. Желізницьова ленія 284 на одтинку од Ліґниці до Єжманиц буде ревітализувана в рамках проґраму Желізниця Плюс.

Рыхтуваня до Европейскых Ігр в Креници

Крениця штораз ближе закінчыня рыхтувань до Европейскых Ігр. Як передал бургомайстер Крениці Пьотр Рыба, част тору МТБ єст уж готова, зроблена єст уж траса dual track, а онедолга місто оголосит конкурс оферт на збудуваня наступных. Ремонт реализуваный єст і в ледовій гали. Бургомайстер Крениці поінформувал, же єст то тяжкій час для власти зо взгляду на терміны і скоре темпо працы, але до мая вшытко буде готове на приізд участників Европейскых Ігр. На реализацию заплянуваных задач місто отримало з Міністерства Спорту і Маршалківского Уряду близко 2,5 млн зл.