Сумар дня на 17. серпня/авґуста 2020 р.

Приносиме вам сумар медияльной ґрупы ЛЕМ.фм+ на ден 17. серпня/авґуста 2020 р.

Русины з Пряшівщыны зачали списову кампанію

В пятницю, 14 серпня/авґуста тр., в Домі Культуры в Старій Любовни зышли ся Русиньска Оброда на Словациі на челі предсідательом Мартіном Карашом, Округлый Стіл Русинів Словациі на челі з предсідательом Петром Штефаняком і русиньскы активісты з шолтысами русиньскых сел окресів Стара Любовня і Сабинів. Была то перша стріча з шолтысами русиньскых сел в реґіонах, орґанізувана в рамках кампаніі до перепису населіня 2021 рока. Русиньскы орґанізациі і активісты хотят подати шолтысам актуальны інформациі о проході кампаніі і заохотити до окремых активности. Округлый Стіл Русинів Словациі подякувал вшыткым за першу стрічу і позитивну одозву.

Воєвода з коронавірусом

Новый малопольскій воєвода Лукаш Кміта зараженый коронавірусом. Потвердили тото проведены в четвер 13. серпня/авґуста лябораторийны баданя. Ден перше малопольскій воєвода поінформувал санітарный інспекторат о контакті з особом, яка была закажена Covid-19. Лукаш Кміта был одраз обнятый домашньом кварантанном. Вшыткы заплянуваны стрічы были одкликаны. Згідно з процедуром, особы з якыма в остатнім часі мал близкій контакт, сут обняты кварантанном. Особы з дальшого контакту будут обняты епідемійолоґічным надзором. Для безпекы кєрівництво Уряду, як і вказаны працівникы будут выконувати своі обовязкы в опертю о здальну працу.

Громадяне Польщы не хочут більше пандеміі

Вчера, т.є. в неділю 16. серпня/авґуста, по 12.00 год. на Старым Місті в Варшаві зачал ся протест під гаслом «Закінчыти Пляндемію», якій єст выразом сопротивліньом ґу діяням в звязку з коронавірусом в Польщы. Орґанізаторы подіі на Фейсбуку написали, же мают уж дост пандеміі. Твердят, же міністер Лукаш Шумовскій другій раз хоче заперти іх дома, заложыти ім на ґамбы маскы, ввести кварантанну по переході през границю, хоче контролі на весілях. Подля орґанізаторів, така ситуация – кєд єй не перервут – буде тырвала роками. На місце протесту на Замковым Пляци в Варшаві приіхала поліция. Згромаджыня притягло великє чысло осіб. Участникы бесідуют, же «не годят ся на тот террор, якій ім засервувано» і одмавляют молитву «Під Твою милост».

Туристы підбили Бєщадскій Нацийональный Парк

Бєщадскій Нацийональный Парк порахувал чысло осіб, якы вошли на гірскы пути в липци/юлию т.р. Было оно мало не о половину, а докладні 45% більше од чысла туристів, якы одвиділи Парк влони в тым самым місяци. Як інформує Бєщадскій Нацийональный Парк, в червци/юнію т.р. по бєщадскых путях ходило більше як 69 тисячів осіб. В липци/юлию на пішы пути вошло іх такой о 100 тисячы більше, бо вшыткого 167,2 тис. Найпопулярнійшыма серед туристів были трасы ведучы на полонины. Дирекция Бєщадского Нацийонального Парку коментує, што фреквенция з липця/юлия то результат свого рода одреаґуваня. Не сподіват ся такого збільшыня чысла туристів в серпни/авґусті, незалежно од актуально доброй хвилі. Туристы прошены сут фурт перестерігати принципів звиджаня вчас пандеміі, добрі індивідуальні рыхтувати ся до путуваня в горы і хоснувати альтернативны пути.