Сумар дня на 17. марця 2020 р.

Приносиме вам сумар медияльной ґрупы ЛЕМ.фм+ на ден 17. марця 2020 р.

Того рока без реконструкциі в Санкові

Реконструкция Битвы під Ґорлицями то єдна з найважнійшых культурных подій ґорлицкого повіту. Орґанізувана єст в часі долгого майового вікенду Ґрупом Історичной Реконструкциі Ґорлиці 1915, при помочы локальных урядів і шкіл та інчых реконструкцийных ґруп, што діют на обшыри ґорлицкого повіту а аж і Словациі. На жаль тогорічна едиция реконструкциі была одкликана. В пятницю, 13. марця, на офіцияльным сайті подіі орґанізаторы подали інформацию, же зо взгляду на безпеку одкликуют тогорічны упамятніня річниці Ґорлицкой Битвы. Дотримуючы ся до рішынь Головного Санітарного Інспекторату і смотрячы на актуальну ситуацию, орґанізаторы не могли зробити по другому.

Новый набір кандидатів до нагороды ім. Оскара Кольберґа.

Музей ім. Оскара Кольберґа в Пшысусі та Одділ Музею Радомского Села в Радомі оголосили новый набір кандидатів до загальнопольской нагороды ім. Оскара Кольберґа. Зголошыня присылати мож до 30. марця, а премія передавана єст в 6-ох катеґориях. Выріжнят ся тых, котры звязаны сут з народныма традициями – артистів творячых народну музику, літературу ци занимаючых ся творіньом ручных выробів, творців підтримуючых реґіональны традициі та дослідників, якы передают і хоронят знаня о народній культурі. Зголошыньовый формуляр находит ся на конкурсовым сайті. Припоминаме, же влони серед нагородженых премійом ім. Оскара Кольберґа, уж другій раз, нашол ся Лемківскій Ансамбль Пісні і Танця «Кычера» з Ліґниці.

Новый проєкt охороны повітря для Малопольского Воєвідства

Якісый час тому писали сме о рыхтуванях і бесідах в справі нового проєкту охороны повітря для Малопольского Воєвідства. На остатній стрічы заряду Малопольского Воєвідства проґрам был єдноголосно принятый. Тепер проєкт буде підданый шырокым соспільным консультациям, котры тырвати будут до 10. квітня/апріля. Зо взгляду на пандемію коронавіруса своі увагы і суґестиі што до проєкту зголошувати буде можна лем за посередництвом інтернету або традицийной почты. В рамках нового проєкту находят ся направчы діяня для ґмін і повітів. Новым обовязком урядів буде м.ін. покликати екодорадців ци вести інформацийны акциі о стані повітря. Окрем того кажда ґміна буде зобовязана передати 1% ґмінных доходів на фінансуваня выміны котлів ци термомодернізациі та інвентаризациі што найменше 90% будинків в цілій ґміні до кінця 2023 рока. Проґрам взял до увагы і тзв. плян короткотерміновых діянь, котры введены будут в моменті загорожыня перекрочыня алярмового рівня. Рішены были 3 ступени загорожыня занечыщыня повітря. Полный плян нового проєкту охороны повітря находит ся на сайті powietrze.malopolska.pl.

Пакєт стабільности і безпекы премєра Матеуша Моравєцкого

На вчерашній пресконференциі премєр Польщы Матеуш Моравєцкій заповіл, же неодолга уряд представит пакєт стабільности і безпекы. Його головном задачом буде помочы польскым працівникам та роботодавцям, котры будут стратны в звязку з пандемійом коронавіруса і єй пізнійшыма консеквенциями. Роботы над проєктом тырвали в остатніх днях в ресорті розвитку і были координуваны самым Моравєцкым. Проєкт передвидує м.ін. стриманя ріжного рода платности ци підпору єдноособовых господарчых діяльности. В часі конференциі бесідувано і на тему медичной інфраструктуры. В каждым з воєвідств приділена буде шпытальна єдиниця дедикувана лікуваню зараженых коронавірусом. На конец апелювал Моравєцкій, жебы дальше дотримувати ся обовязуючых вымогів, што были рішены на час кварантанны.