Сумар дня на 17. лютого/фебруара 2023 р.

Приносиме вам сумар медияльной ґрупы ЛЕМ.фм+ на ден 17. лютого/фебруара 2023 р.

В ПСК збільшыло ся чысло туристів

В 2022 р. в Краю закватерувало ся 888 970 одвиджаючых. То о 69% веце як в попереднім, 2021 році. Чысло є дотля фурт менше од того реґіструваного перед пандемійом – в 2019 році, дотля найуспішнійшым кєд іде о чысло туристів, закватерувало ся в Пряшівскым Краю 1 108 000 одвиджаючых. Актуально Пряшівскій Край є третім найвеце одвиджаным крайом Словациі. Є другій під взглядом одвидин домашніх туристів. Кєд іде о заграничных туристів, найвеце, аж 42%, пришло в минулым році з Чешской Республикы. Туристы з Польщы то 19%, а з Мадяр 9,3% вшыткых заграничных туристів. Найчастійше одвиджаный был Попрад, а дале окресы Кежмарок, Бардиів, Пряшів і Стара Любовня. Векше чысло туристів в Пряшівскым Краю было підперте м.ін. активностями Крайской орґанізациі туристичного руху Северовыход Словациі, такыма як теренова гра для родин з дітми, в котрій вызначены были і місця такы як русиньскы деревяны церкви і памятник князя Лабірця в Габурі. Орґанізация так само занимала ся влони дальшым ознакуваньом біциґльовых стежок ци монтуваньом новых інформацийных табличок про туристів.

Бічскій Ярмак Культуры

Неодолга завершат ся працы при будові Бічского Ярмаку Культуры. Обєкт має быти одкрытый в червци/юнію того рока. Проєкт навязує до давной традициі бічскых ярмаків, а окрем того має на ціли будувати потенциял локального перетваряня, садівництва і плянтаторства. Мали бы там быти продаваны лем локальны продукты. В гандльовій зоні будут три павілоны з 30 закрытыма і 16 одкрытыма стоісками. Додатково є побудувана сцена, на якій ся будут одбывати культурны подіі, а і три працовні, в котрых будут орґанізуваны варштаты і стрічы. Постарано ся і о легкій доступ до обєкту, як іде о містецку комунікацию, і роверовы стоякы. Цілковитый кошт будовы то близко 6 млн злотых.

Записы до ІІІ Едициі Европейского Бігового Фестівалю

Днес рушают записы до ІІІ Едициі Европейского Бігового Фестівалю – Два Бескіды. Тогорічны змаганя одбудут ся в Креници в днях од 30. червця/юнія до 2. липця/юлия. Зрыхтуваных єст 6 дистансів і додатковы бігы для діти. Фестіваль буде в тым році вынятковый, зато же найдолшый дистанс «Креницкя Сотка» буде розгрываный в рамках ІІІ едициі Европейскых Ігр Краків-Малопольща 2023. Більше про записы найдете на фейсбуковым сайті Европейского Бігового Фестівалю.

фото: europejskifestiwalbiegowy.pl