Сумар дня на 17. листопада/новембра 2023 р.

Приносиме вам сумар медияльной ґрупы ЛЕМ.фм+ на ден 17. листопада/новембра 2023 р.

Малопольскє воєвідство солідарне з Пряшівскым Крайом

Малопольскє Воєвідстцо – черезграничный партнер Пряшівского Самосправного Краю – рішыло помочы ПСК по землетясіню сумом єдного мілийона злотых, т.є. приблизно 225 тисячів евро. Малопольскє Воєвідство подарує партнерови на Словациі тоту квоту як прояв солідарности. Землетрясіня, котре прошло там в жолтни/октобрі, спричынило на сході Словациі великы шкоды. ПСК схоснує середкы отриманы од польского партнера на направу пошкодженой землетрясіньом дороговой інфраструктуры, конкретно част дорогы ІІІ клясы медже селами Токаік і Дяпаловці, котра была в епіцентрі землетясіня і актуально є в аварийным стані. ПСК мусит схоснувати подаруваны середкы до кінця грудня/децембра тр., кєд же малопольскє воєвідство выділило іх зо свого буджету на тот рік.

Завершеный конкурс оферт на електричны автобусы до Мушыны

Од червця/юнія будучого рока в Мушыні появлят ся електричны автобусы. Ґміна завершыла конкурс оферт на пят такых автобусів. Іх кошт, разом з будовом стациі ладуваня, то 10 млн злотых. Ціліст буде сфінансувана з урядовых фондів. Як подал бургомайстер Мушыны Ян Ґольба, автобусы будут влучены до публичной комунікациі, але на початку будут сполняти інчу ролю – довозити діти до шкіл. Разом самоуряд має в будучым році позыскати 11 автобусів – окрем пятьох електичных мают купити іщы 6 низкоемісийнных автобусів. Іх кошт то около 8 млн злотых.

Православна парохія в Перегримці продолжат колекту на ремонт

Православна парохія св. Михала Архангела в Перегримці просит о дальшу фінансову підпору при ремонті даху на своій понад 100-літній святыни. Як сме недавно інформували, выміна покрытя єст конечна, бо як ся вказало – дах церкви єст в барз злым стані, в даякых місцях аж і діравый, што горозит серіозным пошкоджыньом поліхроміі і выпосажыня середины. Затля повело ся помалювати ґзимсы і зробити одгромову інсталяцию. Тепер продолжуют выміну покрытя пласкых елементів даху. Мотузок до колекты найдете на нашым сайті в днешнім сумарі або на сайті zrzutka.pl – наголовок «Ремонт даху церкви в Перегримці».

Антинаркотикова акция в Польковицях

В Польковицях проходит антинаркотикова акция. Орґанізатором єст Армія Польковиці. Не іде єднак лем о стрічы і бесіды, але о заінтересуваня фізичном активністю так молодежы, як і дорослых. Фізична активніст в буд-якій формі має одтягнути особливо молодых люди од наркотиків і інчых легко доступных середків. Кампанія рушыла уж в социяльных сітях, де тішыт ся великым заінтересуваньом. Для осіб, котры влучат ся до проєкту, сут передвиджены запрошыня на тренінґы в спортовым клюбі і кошелькы промуючы акцию. Фінал акциі єст заплянуваный на 15. грудня/децембра.

Вернісаж выставы «Акварелі» Данєля Щербы 

Днес, в пятницю 17. листопада/новембра в просторах музею Дворы Карвациянів і Ґладышів пройде вернісаж выставы Данєля Щербы «Акварелі». Данєль Щерба то молодый артиста з околиц Ґорлиц. В своіх працах вказує краєвиды, головні Бескідів, але тіж Татр ци Бєщадів. В особливый спосіб вказує красу Низкого Бескіду з лемківском архітектуром – старыма хыжами ци дервняныма церквами. Окрем малярства занимат ся тіж фотоґрафійом, што мож было обзерати в часі його выставы «Migawki beskitu». Вернісаж выставы «Акварелі» пройде о 18.00 год. в каштели в Шымбарку. Выстава буде одкрыта до 12. грудня/децембра.

Мотузок до колекты: https://zrzutka.pl/5cuvx4