Сумар дня на 17. листопада/новембра 2021 р.

Приносиме вам сумар медияльной ґрупы ЛЕМ.фм+ на ден 17. листопада/новембра 2021 р.

Кампанія ПГА

Вчера рушыла загальнопольска соспільна кампанія, цілю котрой є вказати, што необхідне є як найскорше зорґанізувати професийну гуманітарну поміч в зоні выняткового стану. Кампанію пн. «Ошуканы, безборонны, нашы ближні – можеме іх вратувати» реализує парунадцет орґанізаций, м.ін. варшавскій Клюб Католицкой Інтеліґенциі, Польска Гуманітарна Акция ци Родины без Границ. Цілю кампаніі є усвідомити, што при польско-білорускій граници находят ся люде змушаны блукати по лісі. Часто спрагнены, голодны, змерзнены, хворы. З причыны того, што обшыр при граници з Білорусю была оголошена зоном вынятового стану, орґанізациі, якы несут поміч, активісты ци медиі не мают на ню входу. Кампанія творена є орґанізациями з ріжным профільом діяльности, што ма вказати, же незалежні од того, як оцінюют основы кризы на граници, найважнійше є ратувати жытя і здоровля чловека.

Маґурскій Нацийональный Парк закінчыл сезон білетуваного вступу до Парку

Маґурскій Нацийональный Парк подал, якы квоты вплынули на конто Парку по скінченым сезоні, якій обовязує од марця до кінця жолтня/октобра, коли вступ до Парку можливый єст по закупліню білету. Приходы з десятьох касовых пунктів вынесли разом 114 157 зл. Найвекшым заінтересуваньом тішыл ся вхід на парковы пути в пункті в Фолюшы, то близко 38,5 тис. зл. Другє місце в ранкінґу, кус веце як 20 тис. зл, занял пункт в Вапенным, при вході на Фердель, де находит ся видокова вежа. На обшыри Маґурского Нацийонального Парку можлива є піша, роверова і конна туристика протягом цілого рока од сходу до заходу сонця. По змерканю не мож переміщати ся по Парку. Піша туристика може одбывати лем по вызначеных шляках, роверова – лем по публичных дорогах, вызначеных біциґльовых трасах і вызначеных Парком закладовых дорогах, а конна туристика – лем по вызначеных до того путях.

В Новым Саді промоция збіркы з русиністикы

На пятницю, 19. листопада/новембра, в Новым Саді в Сербіі заплянувана є промоция русиньского «Збірника робіт пятой науковой конференциі студентів, молодых науковців і фаховців». Є то поконференцийна публикация, з онляйновой конференциі (проведеной в такій формі з причыны пандемічных ограничынь), яка проходила 12. мая тр. Єй орґанізатором была Новинарско-выдавнича Установа Рускє Слово/ Часопис Мак і Завод за Культуру Войводиньскых Русинів. Выдавцьом публикациі є Одділіня Русиністикы Філософічного Выділу Університету в Новым Саді та неформальне здружыня Выглєдовацкій Круг. В збірнику нашли ся роботы осмох авторів, м.ін. Аны Рымар Симунович, Єлены Дудаш, Сашы Сабадоша, Марины Сакач ци Дороты Будиньской.

Рисункы Никыфора інспірацийом для музикы

4. грудня/децембра о 17.00 год. в Музею Никыфора в Креници пройде концерт пн. «Музиком малюваный Никыфор». Буде то презентация 12 творів скомпонуваных перкусистом Рафалом Бонісняком (Boniśniak), інспіруваных дванадцетьома конкретныма рисунками Епифания Дровняка. Артисті товаришыти будут музикы: Мирослав Боґонь, Томаш Кубаля і Пьотр Пшыровскій. Вступне на концерт дармо.

Фот. www.ruskeslovo.com