Сумар дня на 17. листопада/новембра 2020 р.

Приносиме вам сумар медияльной ґрупы ЛЕМ.фм+ на ден 17. листопада/новембра 2020 р.

Тяжка ситуация бєщадскых жубрів

Не так давно інформували сме о пошырюючій ся серед бєщадскых жубрів хвороті, котра веде до сліпоты. Зато Ґенеральна Дирекция Охороны Середовиска выдала згоду, жебы одстрілити 15 хворых звірят. На жаль то іщы не конец, хворота дальше ся пошырює.  Проблемови бєщадскых жубрів посвячено листопадову стрічу комісиі до справ жубрів, што діє при Реґіональній Дирекциі Державных Лісів в Коросні. Як підкрислила проф. Ванда Олех, ведуча Стоваришыня Любителів Жубрів, погіршаюча ся ситуация звірят єст консеквенцийом за великой популяциі. Комісия розважат перенести част жубрів за границю і выселити молоды особникы з показовой загороды до дикых стад в Польщы. Присутны на стрічы специялисты рекомендували тіж дальшу редукцию стад і одстріл найбарже хворых звірят. Згідні з тогорічныма даныма, в Бєщадах на свободі прожыват 668 жубрів, а літом вродило ся більше як сто молодых жубрів.

Термін присыланя конкурсовых прац в конкурсах МНП перенесеный

З нагоды 25. річниці істнуваня Маґурского Нацийонального Парку зрыхтувано два конкурсы. В звязку з перешкодами, котры тыкают ся теперішньой ситуациі в основных школах, орґанізаторы рішыли перенести термін присыланя конкурсовых прац в обох конкурсах о тыжден – з 16. листопада/новембра на 23. листопада/новембра. Припоминаме, же першый з конкурсів пн. «Картка з Маґурского Парку» орґанізуваный єст уж 15. раз, тыкат плястичных здібности і направленый єст на учеників основных шкіл. Конкурсовы роботы мают вказувати найліпшы спомины молодых люди з вандруваня по МНП. Роботы оціняны будут в трьох віковых катеґориях – клясы І-ІІІ, ІV-VІ і VІІ-VІІІ. Другій конкурс то нова думка і перша едиция. Направленый єст на учеників середніх шкіл і тыкат ся компутеровой ґрафікы. Задачом єст запроєктувати ювілейну окладинку часопису «МАҐУРА». Праца мусит вказувати особливу красу і захопліня МНП. Найліпшы працы мож буде обзерати на поконкурсовій выставі, а найліпшы з найліпшых будут проєктами карток і окладинкы.

Новы пути і атракциі в Бєщадах

В долині выжнього Сану явила ся нова туристична атракция. Одднес можна уж вандрувати з Мучного до видоковой вежы, што ся находит на верху Єленячого, одкале видно польскы і украіньскы Бєщады. Нова стежка возникла в рамках Промоцийного Лісового Комлексу «Бєщадскы лісы». Стежка свій конец буде мала в Выжнім Дзвинячу, неістнуючым уж селі, котре перед войном рахувало аж 1500 мешканців. Полне ознакуваня стежкы закінчыт ся перед ярю 2021 рока. Пресовый секретар Реґіональной Дирекциі Державных Лісів в Коросні підкрислил, же в Бєщадах винны возникати наступны пути, котры притягнут туристів в ріжны части гір, не лем в полонины. Тото дозволило бы розвязати проблем за вельох люди на стежках, што міцно докучало туристам того рока. Долина Сану надайе ся до того ідеальні, то дале не до кінця одкрыта обшыр Бєщадів, з красным краєвидом та богатом і цікавом історийом.

XXXVII Ґорлицкій Салон

До 15. грудня/децембра можна складати своі артистичны роботы на шторічну выставу Ґорлицкого Плястичного Середовиска. До участи прошены сут прожываючы на обшыри Ґорлиц непрофесийональны артисты. Як што рока конкурсова капітула спосеред участників выбере лавреата і признат нагороду Міста Ґорлиці ім. Альфреда Длуґоша. Складаны роботы мусят сполняти пару вымогів, м.ін. не можут быти презентуваны на попередніх выставах «Горлицкого салону» і возникли протягом остатніх двох років. Описаны працы треба донести до Ґалериі Штукы «Двір Карвациянів». Термін одкрытя выставы «XXXVII Ґорлицкого Салону» буде поданый в найблизшым часі.