Сумар дня на 17. липця/юлия 2023 р.

Приносиме вам сумар медияльной ґрупы ЛЕМ.фм+ на ден 17. липця/юлия 2023 р.

Урядовый Проґрам Одбудовы Забытків, а серед закваліфікуваных внесків забыткы з Лемковины

15. липця/юлия премєр Матеуш Моравєцкій разом з міністром культуры і нацийональной спадковины Пьотром Ґліньскым оголосили результату Урядового Проґраму Одбудовы Забытків. Його цілю єст промувати і підтримувати самоуряды в ремонтуваню і консервациі забытковых обєктів. Того рока дофінансуваня отримало близко 5 тис. проєктів, серед котрых нашли ся тіж забыткы з Лемковины. В ґорлицкым повіті в рамках проєкту зреализуют м.ін. такы задачы як ремонт забытковой школы в Білянці, реновация ріжных части середвічного міста Біч, консервацийны і ремонтовы працы в церквах в Чорній, Высовій, Устю Рускым, Ждыни, Шквіртным, Ліщынах, Ганчовій, Розділю, Лоси і Санковій. В новосандецкым повіті дофінансуваня отримали задачы тыкаючы м.ін. реновациі капличкы в Верхомли Великій ци консервациі церкви в Полянах. В ясельскым повіті реализуваны будут задачы звязаны з реновацийом цмонтерів в Грабі, Ожынній і Полянах, консервацийом іконостасу в церкви в Святкові Малій і в Котани, реновацийом храму в Полянах і Мысцовій. Додатково дофінансуваня отримал тіж проєкт на реновацию капличок і придорожных крестів на обшыри ґміны Крампна. В бєщадскым повіті в рамках проєкту выремонтуют дзвінницю при церкви в Поляні та забезпечат руіны святыні в Кривым.

Нова атракция в Мушыні на зиму і літо

Ґміна Мушына підписала догваріня з PKL на реализацию проєкту будовы Родинного Комплексу Зимовой і Літньой Рекреациі Мушына-Щавник-Верхомля. Місто уж тепер може ся похвалити многым чыслом атракций, котры каждого рока притігают штораз більше туристів. Реализация проєкту поділена єст на два етапы – в першым побудуют інфраструктуру потрібну, жебы занимати ся зимовыма спортами. Будут то што найменше дві модерны колейкы, пару вытягів, специяльны трасы для діти та ґастрономічны пункты. В другым етапі зосереджат ся на літніх атракциях. В рамках той части прац в місті і околицях побудуют трасы для гірскых роверів, ґравітацийный тор, місце для водной рекреациі ци видокову вежу. В проєкті находит ся тіж будова ґондольовой колейкы, котра получыт Креницку Яворину зо Щавником.

«Карпатскій Соспільно-Культуральный Перегляд»

Вышол черговый номер часопису «Карпатскій Соспільно-Культуральный Перегляд». В публикациі мож чытати м.ін. статю о артистці з Вільхівця, допис про церкви західньой части Низкого Бескіду ци бесіду з заступцьом директора Бєщадского Нацийонального Парку на тему вертаня природы в місця, з котрых выгнал єй чловек. В новым чыслі «Карпатского Соспільно-Культурального Перегляду» поміщена є і статя Адама Шары о зілю в меню Бойків, Лемків та інчых ґруп, котре мож было найти на луках початком карпатского літа. Часопис мож придбати в будинку Стоваришыня для Розвитку і Промоциі Підкарпатя Pro Carpathia.

«При Джерелах»  – концерт в церкви в Бортным

29. липця/юлия Музей Дворы Карвациянів і Ґладышів просит до грекокатолицкой церкви в Бортным на концерт пн. «Тобі співаме» памяти Димитрия Бортняньского. Подія пройде в рамках VIII едициі Медженародного Фестівалю «При Джерелах». В проґрамі концерту находят ся творы Бортнаньского, лемківска музика і світовы творы клясичной музикы, котры запрезентує 6 артистів, в тым лемківска піснярка Юлия Дошна і гушляр Мариюш Мончак. Концерт зачне ся о 16.00 год. Вступне дармо.