Сумар дня на 17. квітня/апріля 2020 р.

Приносиме вам сумар медияльной ґрупы ЛЕМ.фм+ на ден 17. квітня/апріля
2020 р.

Одышла  Мария Стеранка-Трохановска, звізда «Лемковины»

З жальом інформуєме, што 14. квітня/апріля в віку 82 років вмерла Мария Стеранка-Трохановска, долголітня і заслужена солистка Репрезентацийного Ансамблю Пісні і Танця «Лемковина» з Білянкы. Похорон одбыл ся вчера, 16. квітня/апріля, в православній церкви св. Тройці в Любіні. Пак тіло покійной одведено на цмонтір до підлюбіньского села Зимна Вода, де Мария Стеранка-Трохановска спочала в гробі при мужу. Покійну знаме головно з того, што была долгорічном солистком леґендарного ансамблю Лемковина. Співала в ансамблю в часі, коли был він найбарже успішный і найбільше досяг. Стеранка-Трохановска знана была в Лемковині з натурально міцного голосу, котрым выспівувала так лемківскы народны співанкы, як і патріотичны пісні. Была філяром ансамблю, брала участ в першых Лемківскых Ватрах в Горах, котры были музичныма варштатами колективу. Взяла участ в турне Лемковины по ЗША i Канаді в 1987 р. Попри м.ін. Маестрі Ярославі Трохановскым, Штефаніі Трохановскій, Петрі Трохановскым, Павли Стефановскым, Федорі Ґочу, як раз Мария Стеранка-Трохановска была єдном з найвеце заслуженых осіб з кругу білянчаньского ансамблю.

Ізолятория для зараженых коронавірусом буде в Креиници

В Креници урухомлят ізоляторию для зараженых коронавірусом – такє рішыня выдал малопольскій воєвода Пьотр Цвік. О плянах зорґанізуваня такого місця бесідувано уж перед тыжньом. Спекулювано товды о його локалізациі. Днес знатя, же ізоляторию урухомлят в курортній санаториі Міністерства Внутрішніх Справ і Адміністрациі, значыт в бывшым Continental-и. Утворіня і ведіня ізоляториі воєвода доручыл Специялистичному Шпытальови ім. Снядецкого в Новым Санчы. До єдиниці кєруваны будут хворы на COVID-19, котрых не треба лікувати в шпыталях, тоты, в котрых підозрює ся захворіня (сут скєруваны дохторьом на лікуваня або лябораторийной діяґностикы), тоты, котрым дохтор рекомендувал ізоляцию дома, але з огляду на можливіст заражыня осіб з ґрупы підвысшеного ризика не повинны з нима перебывати або з інчых причын не можут быти в кварантанні дома. Кошты бытуваня в ізоляториі покрыє Нацийональный Фонд Здоровля.

Рушыли торговиці в Ґролицях

Власти міста Ґорлиці рішыли, што од днес приверненый є торг на тзв. масляным рынку. Буде мож гандлювати квітьом, саджінками, овочами, яринами ци молочныма продуктами. Не буде мож гандлювати облечыньом, выробами з дерева, лозины і інчым подібным. Поінформувал о тым бургомайстер Ґорлиц Рафал Кукля. Подібне рішыня піднял властитель Погіряньского Ярмаку при Бічскій улици. І там буде мож купити лем квітя, овочы ци ярины. Гандлюют гын головні локальны плянтаторы і загородникы. Власти міста пояснюют, што такє рішыня підняли, жебы дати можливіст заробити місцевым ґаздам зо взгляду на тото, што появили ся уж сезоновы продукты. Є то тіж реакция на заповіди Презеса Рады Міністрів про помале одморожаня польской економікы.

Вшыткого доброго!

Вшыткым слухачам радия лем.фм і чытачам порталю, Русинам і не Русинам, перед котрыма святкуваня праздника Воскресенія Христового, желаме вельо здоровля, радости і спокійного прожытя світлого періоду Великодніх Свят. Хоц зовнішній світ приносит нам остатнім часом мало добрых вісти, най же тота радіст, яку несе зо собом Праздник Праздників, покріплят Вас, огріваючы і зміцняючы довіря, же уж онедолга придут ліпшы хвилі і зас будеме мочы ся вшыткы зыйти вєдно.

Фот. Галіна Ґайда, gorlice.naszemiasto.pl