Сумар дня на 17. червця/юнія 2020 р.

Приносиме  вам  сумар  медияльной  ґрупы  ЛЕМ.фм+  на ден 17. червця/юнія 2020 р.

Г. Куприянович приміром Б. Ґайды посылат звіданя до кандидатів на президента Польщы

Початком марця інформували сме, што в звязку з надходячыма президентскыма выборами в Польщы Бернард Ґайда, ведучый Союзу Німецкых Соспільно-Культурных Стоваришынь в Польщы, подал писмо зо звіданями до кандидатів на Президента Польщы. В писмі тым Ґайда звідувал кандидатів м.ін. о іх однесіня до вельокультуровости і промуваня меншын, реакцию на ксенофобічны поставы ци готовіст до новелізациі закону о меншынах з 2005 рока. Перед парома днями з подібным писмом звернул ся до актуальных кандидатів на уряд президента Польщы Григорий Куприянович – спілведучый Спільной Комісиі Уряду та Нацийональных і Етнічных Меншын, представник украіньской меншыны. Звідує він м.ін. о однесіня взглядом постуляту покликаня інституций культуры меншын, о плянуваны діяня як президента взглядом меншын, о хоснуваня языків меншын ци постулят хоснуваня взглядом меншын тзв. політикы взаімности, значыт узалежняня діянь польской державы взглядом громадян од політикы інчых держав. Куприянович звідує і о потребу забезпечыня меншынам репрезентациі в парляменті. На писмо Бернарда Ґайды з марця дотепер одповіл выключні Шымон Головня.

В памят святых Павла і Йоанны – літургія в Святковій Великій

В суботу, 13. червця/юнія, згідні з традицийом, прошло православне богослужыня в Святковій Великій. Літургію служыли з нагоды споминаня св. Мучеників Холмскых і Підляшскых, особливі священника мученика Павла (Швайко) і мучениці Йоанны, його жены, котры перед тым як трафили на Холмщыну, прожывали на Лемковині. При капличці, де в суботу правили літургію, св. Павел Швайко служыл богослужыня в меджевоєнным періоді. Перед літургійом отец Марек Ґоцко посвятил воду. Богослужыня очелювал архієпископ перемышльскій і ґорлицкій Паісий, асистували му священникы ґорлицкого і саноцкого деканатів та ігумена Пафнутия з Запалова. Проповід до вірных выголосил о. Петро Пупчык з Крениці. По літургіі зо словом до вірных звернул ся владыка Паісий. Закликал вшыткых до «жарливой службы Православній Церкви в духу послуху та смиренія, так як робили то святы Павел і Йоанна». Співал хор під ведіньом імости Мариянны Ярой.

«Бесіда»

Стоваришыня Лемків напечатало дальшый номер свого часопису – «Бесіда», ч. 3 (174), на місяці май-червец/юній. В тым выданю мож чытати м.ін.: допис Андрия Ковальского пн. «Євген Габура личністю 2019 рока в катеґориі Соспільна і Благотворна діяльніст», Андрия Копчы пн. «Чым был Трянон для Русинів (До 100-літя Тряноньского Трактату з 4 червця 1920 рока)» ци Петра Трохановского «Сын Лемковины (Памяти Івана Русенкы)». Першый раз в понад тридцетлітній істориі часопису трафило ся так, што редакция не мала што вмістити до постійной части «Новины, не новины – не лем з Лемковины». Пандемія коронавіруса вдарила сильно в культурне, політичне, соспільне жытя Русинів не лем в Польщы, але і на цілым світі. «Бесіду» мож чытати в бібліотеці Руской Бурсы в Ґорлицях, котра отворена єст од понеділька до пятниці в год. 8.00-16.00. Ґазета є тіж доступна в локальных Кружках Стоваришыня Лемків в Польщы.

Нове, а такой старе – нова атракция ґролицкой землі

В неділю, 14. червця/юнія, на мапі туристичных атракций ґорлицкой землі офіцийні появило ся нове, тепер уж рідко стрічане, місце. Давнійше не было села, жебы такого становиска бракувало. В Корчыні близко Біча отворили Старопольску Кужню з палениском і ориґінальным міхом до тлочыня повітря. Думкодавцьом і творцьом кужні є Вєслав Червєнь, презез Історичного Стоваришыня Польской Ізды та член 8. Полку Уланів князя Юзефа Понятовского. Своіма руками, од основ, створил місце, котре продолжат традицию загыбаючой професиі підкуваня кони. На офіцийным одкрытю присутный был бургомайстер Ґорлиц Рафал Кукля. Кужня в Корчыні то не лем атракция зо згромадженыма історичныма артефактами ковальской професиі для туристів, але вполни діючый варштат. Вчас одкрытя, по офіцийній части, прошли показы підкуваня кони та кавалерскій выступ.

Фот. Миколай Ґрич, за: orthodox.pl