Сумар дня на 16. вересня/септембра 2024 р.

Приносиме вам сумар медияльной ґрупы ЛЕМ.фм+ на ден 16. вересня/септембра 2024 р.

Малопольща інвестує в желізницю

Малопольща збогатит ся о новы потягы. Першы пасажеры поіхают нима уж за нецілы три рокы. Закуп потагів буде дофінансуваный з Европейскых Фондів. Малопольскы Желізниці підписали в минулый понедільок рамове догваріня на закуп 25 потягів. Вартіст того проєкту то понад 1,3 млд злотых. Потягы будут обслугувати трасы на обшыри Малопольщы і сусідніх воєвідств. Выконавця достарчыт модерны склады, выпосажены в 236 сідячых місц і 550 місц загальні. Разом помістят 5 900 пасажерів на сідячых місцях і 13 750 пасажерів загальні. Завдякы специяльному выпосажыню, потягы будут пристосуваны до перевозу осіб з неполносправностями, жен в тяжы, діти, старшых осіб і пасажерів з тяжкым баґажом. На основі підписаного догваріня на закуп потягів, Малопольскє Воєвідство буде реализувало выконавчы догваріня на іх доставу. Початок одбераня потягів єст плянуваный на 2027 р.

З креницкого шпыталя будут літати гелікоптеры

Власти новосандецкого повіту плянуют будову геліпаду для гелікоптерів близко креницкого шпыталя. Поінформувал о тым староста Тадеуш Заремба. Має то звязок зо зміном переписів тыкаючых службы здоровля. Згідно з уставом такій геліпад повинен ся находити не дальше як 5 минут ізды автом од шпыталя – амбулянсом буде то около 1,5 минуты. Крениця єст полна туристів, зато скорый транспорт пошкодуваных може быти часами утрудненый. Геліпад поможе усправнити комунікацию. Тырват уж процес выбору найліпшой оферты на опрацуваня проєктовой документациі для той задачы.

Шаховый турнір в Осередку Православной Культуры в Ґорлицях

Православна парохія св. Тройці в Ґорлицях просит вшыткых охочых до участи в шаховым турніри, в рамках ХІХ Екуменічной Спортовой Олимпіяды «Єдніст в спорті». Змаганя одбудут ся в суботу 28. вересня/септембра на терені Осередка Православной Культуры при церкви о 9.00 год. Змаганя будут проходити в трьох віковых катеґориях: до 10. років, до 16. років і старшы. Участ в турніри єст дармова. Записы будут проходити в ден змагань од годины 8.30.

Конкурс «Eнді Варголь в моім селі» до кінця того місяця

Припоминаме, што іщы через два тыжні мож взяти участ в плястичным конкурсі пн. «Eнді Варголь в моім селі», котрого орґанізатором єст Стоваришыня «Руска Бурса» в Ґорлицях. До выграня сут цінны нагороды. Іде о зробліня плястичных робіт, котры будут інспіруваны творчістю Енді Варголя. Малюнкы можут представляти сценкы зо штоденного жытя мешканців села, іх роботу, звыкы, ілюструвати архітектуру села ци краєвиды, представляти жытелів сел – портреты. Задачом є зробити іх в такій спосіб, як творил Варголь – попартово. Роботы будут оцінюваны в трьох віковых катеґориях: до 8 років, од 9 до 11 років і од 12 до 14 років. До выграня сут чытникы KINDLE і інчы цінны нагороды. Роботы (велькости А4) треба прислати до 30. вересня/септембра тр. на адрес Руской Бурсы в Ґорлицях. Дрібниці та мотузкы до реґуляміну і згоды на участ дітины в конкурсі найдете в дописі на нашым портали. Роботы будут пак презентуваны в будинку Руской Бурсы в Ґорлицях – вчас вернісажу пройде оголошыня лавреатів і вручыня нагорід. Красні заохочаме взяти участ в конкурсі!