Сумар дня на 16. січня/януара 2024 р.

Приносиме вам сумар медияльной ґрупы ЛЕМ.фм+ на ден 16. січня/януара 2024 р.

Зачал ся конкурс «Задбаный забыток», того рока з новом катеґорийом

Зачала ся нова едиция конкурсу «Задбаный забыток» орґанізуваного Міністром Культуры і Нацийональной Спадковины при спілпрацы з Ґенеральным Консерватором Забытків. Цілю конкурсу єст нагородити властителів ци заряджаючых забытками за іх роботу і опіку. Што важне – в конкурсі можут брати участ властителі обєктів, котры сут вписаны до Реґістру забытків. Конкурс поділеный єст на пару катеґорий: утырваліня забытковой вартости; ревалоризация культурового простору; адаптация забытків; деревяна архітектура і будівництво; забыткы технікы та специяльне выріжніня за властиве хоснуваня і постійну опіку над забытком. Того рока орґанізаторы рішыли о парох змінах в конкурсі, м.ін. ввели нову катеґорию «Забыток доступный», котра присвячена єст стараням над достосуваньом обєктів для осіб з особливыма потребами. Лявреаты та выріжнены в конкурсі отримают почестну ґрамоту Ґенерального Консерватора Забытків та табличку до ознакуваня обєкту як задбаный забыток. Додатково выріжнены обєкты будут презентуваны в публикациях выдавництва Інституту Нацийональной Спадковины. Зголошыня мож пересылати до 14. лютого/фебруара, формуляр та реґулямін конкурсу находят ся на офіцийным сайті Інституту.

Штораз ближе до одданя сельской світлиці в Чыстогорбі

Ґміна Команча поінформувала, што закінчыл ся першый етап ремонту сельской світлиці в Чыстогорбі. В рамках реализуваной задачы вырівнано і одмалювано стіны і повалу, вымінено гніздка і кафелькы. Проведены роботы тыкали ся тіж достосуваня кухонной базы ци направы вентиляці. На обшыри ґміны Команча актуально функцийонує 8 сельскых світлиц, а іх діяльніст має на ціли інтеґрацию та ініциюваня активности жытелів. Окрем мешканців Чыстогорбу світлиця служыт тіж локальному Спортово-Рекреацийному Стоваришыню «Жбік- Команча».

Зимовы вакациі в Етноцентрі Кросняньской Землі

Етноцентр Кросняньской Землі просит діти і молодіж до участи в варштатах з нагоды зимовых вакаций. Як і в попередніх роках орґанізаторы зрыхтували 2-тыжньовы турнусы. Занятя для діти будут проходити од віторка до пятниці через 4 годины, в тым часі участникы будут мочы взяти участ в кулінарных, плястичных варштатах и ручной роботы. Першый турнус під гослом «Карнавал в Етноцентрі» пройде од 30. січня/януара до 2. лютого/фебруара, наступный «Помалюй зиму» буде тырвал од 6. до 9. лютого/фебруара. Участ в варштатах можут взяти діти в віку од 7. до 14. років. Для молодшых участників Етноцентр зрыхтувал вікендовы варштаты, в котрых можут взяти участ цілы родины. Записати мож ся через інтернетовый сайт ЕКЗ, де находит ся обовязковый формуляр. Чысло місц єст ограничене.

Одкрытя і наданя імена шахті ҐҐ-1 в Квєліцах

В Квєліцах, гміна Ґрембоціце прошла подія наданя імена шахті ҐҐ-1. В тот спосіб хотіли ухонорувати проф. Юзефа Звєжыцкого – вченого, котрый як першый бадал мідьовы зложа на обшыри Польковиц. В стрічы взяли участ представникы KGHM, самоурядовці та працівникы Учелен з Вроцлавя і Польковиц. Подія наданя імена была одраз упамятнена таблицьом одкрытом коло новой шахты. Як підкрислено в часі подіі, урухомліня новой шахты дозволит одкрыти новы поклады міди і продолжати діяльніст копален з околиц Польковиц. Нова шыхта єст тіж рекордовом під взглядом губокости.

фот. Інститут Нацийональной Спадковины