Сумар дня на 16. мая 2023 р.

Приносиме вам сумар медияльной ґрупы ЛЕМ.фм+ на ден 16. мая 2023 р.

Вмер о. прот. Григорий Назар

З жальом інформуєме, што в неділю 14. мая вмер о. прот. Григорий Назар, парох грекокатолицкых парохій в Ґорлицях і Білянці. Священник такой од самого початку свого душпастырюваня звязаный был з Лемковином, служыл не лем в Ґорлицях і Білянці, але і вірным в Боднарці, Панкній і Рыхвалді. Бл. п. о. Григорий Назар міцно анґажувал ся в промуваня лемківской культуры. Спілпрацувал з фольковым ансамбльом Серенча, анґажувал ся в орґанізацию Малопольскых Дни Культуровой Спадковины, брал участ в Фестівали Церковной Музикы та пропаґувал ідею Зъізду Боднарчан. За своє заанґажуваня і вклад в промуваня та підтримуваня лемківской спадковины был нагородженый в Конкурсі Малопольского Воєвідства ім. Марияна Корнецкого, а тіж выріжненый нагородом ґорлицкого повіту «Мосты Старосты». По выбуху войны в нашых сусідів заанґажувал ся в поміч Украіні. 16. мая в грекокатолицкій церкви в ґорлицях пройде Літургія і Парастас, пак тіло Покійного буде перевезене до Циґанка, де в пятницю 19. мая одбуде ся похорон. Вічна Памят!

Ансамбль Ластівочка серед лавреатів Нагороды ім. Оскара Кольберґа

Міністерство Культуры і Нацийональной Спадковины оголосило результаты тогорічной, 48. едициі Нагороды ім. Оскара Кольберґа «За заслугы дла народной культуры». Єй цілю єст підтримувати народных артистів, котры промуют та культивуют своі традициі, в тым спів, танец ци літературу. Выріжніня отримуют тіж дослідникы, популяризаторы та інституциі і орґанізациі занимаючы ся документацийом традицийной культуры. Нагорода признавана єст в осмох катеґориях: творці занимаючы ся шыроко пониманым малярством або фольковом музиком і танцьом; Мастер традициі; народне писарство; дослідникы, науковці і аніматоры; народны капелі; фольклористичны ансамблі і інституциі і орґанізациі. Серед многых выріжненых нашли ся тіж представникы лемківской культуры – Лемківскій Ансамбль Пісні і Танця «Ластівочка» з Пшемкова. Торжественне вручыня выріжнінь пройде 12. липця/юлия в часі ґалі на Королівскым Замку в Варшаві. Лавреаты окрем медалів і почестных грамот отримают фінансову підпору.

«Поміч для Карпат»

Орґанізация Greenpeace в минулым тыжни зачала 5-тыжньову подорож під гослом «Поміч для Карпат» через пят держав Карпат: Румунію, Украіну, Мадяры, Словацию і Польщу. Має она на ціли удокументувати поступуючу девастацию цінных для екосистему лісів, котры – як вказуют досліджыня – зникают в барз скорым темпі. Причыном того може быти факт, што менше як 3% карпатскых екосистемів находит ся під стислом охороном, а то значыт, же решта обшыри наражена єст на знищыня через вытинку. З той причыны орґанізация апелює до власти ввести загальноевропейскій проґрам охороны Карпат. Greenpeace припоминат тіж, што пасмо Карпат то не лем єден з найстаршых лісовых екосистемів на нашым континенті, але тіж шанса на злагоджыня ефектів климатичных змін та місце прожываня многых загороженых ґатунків, такых як медведі ци рысі.

ЕтноПольща 2023

11. мая оголосили результаты проґраму ЕтноПольща орґанізуваного Нацийональным Центром Культуры. Реализуваный він єст од 2018 р., а його цілю єст підтримувати локальны і культуровы достоменности та творити можливости до участи в культуральным жытю так на селі, як і в місті. До тогорічной едициі проґраму зголошено рекордове чысло внесків – понад 2000, з чого 345 отримало дофінансуваня. Серед выріжненых нашли ся внескы м.ін. Фонду для Нематерияльной Культуровой Спадковины в Польщы на задачу пн. «Лемківскє кривулькарство та народна пацюркова біжутерия. Документация, діґітализация і архівізация», Стоваришыня Карпатскій Еврореґіон Польща на задачу «Carpathia EtnoWeekend» та Бєщадского Народного Університету на задачу «Карпаты горы культуры». Фінансову підпору отримал тіж Ґмінный Осередок Культуры в Устю Рускым на орґанізацию концерту «Вечеря в Мариі».