Сумар дня на 16. мая 2022 р.

Приносиме вам сумар медияльной ґрупы ЛЕМ.фм+ на ден 16. мая 2022 р.

Стріча з авторами альбому «Світ під Кычером»

В середу, 11. мая, в Містній Публичній Бібліотеці в Хойнові одбыла ся стріча в рамках циклю Стріч з Реґіональном Книжком. Темом стрічы был альбом «Світ під Кычером», якій был доціненый званьом Ліґницка Книжка 2020 Рока. Гістми стрічы были редактор публикациі і заєдно ведучый ансамблю Кычера – Юрий Стариньскій, та авторы фотоґрафій Петро Кузяк і Рафал Выцішкєвич. Юрий Стариньскій приближыл участным історию Лемківского Ансамблю Пісні і Танця «Кычера» та фестівалю «Світ під Кычером». Стріча была і нагодом припомнути історию лемківской соспільности на Нижнім Шлеску. Члены Кычеры Анна і Михал Ґожыньскы запрезентували пак участным лемківскы народны пісні.

В вакациі верне желізницьове получыня Біч-Крениця

Малопольскы Желізниці рішыли зас одкрыти вакацийны вікендовы получыня з Біча до Крениці. Потяг «Włóczykij» поіхат том трасом уж 2. липця/юлия і буде ньом курсувал до 28. серпня/авґуста. Ціла траса займе кус понад дві годины. Потяг зо стациі в Бічы піде через Ґорлиці Загіряны, Новый Санч і Мушыну аж до Крениці. В Мушыні пасажеры будут мочы ся пересісти в потяг ідучый в Высокы Татры на Словациі. Малопольскы Желізниці мают і в плянах зас одкрыти вакацийне вікендове получыня Ясло-Крениця, так само через Біч, Ґорлиці Загіряны, Новый Санч і Мушыну.

Добры вісти про Европейскы Ігры в Креници

Як подал на своім фейсбуковым профіли бургомайстер Крениці Пьотр Рыба, 13. мая в Креници гостил маршалок малопольского воєвідства Вітольд Козловскій. Маршалок передал добры вісти тыкаючы орґанізациі Европейскых Ігр Краків-Малопольща 2023 та візитувал зреализуваны інвестициі, в тым Загороды Сил Натуры і Бульвары Дітля. За бургомайстром, заран в Варшаві буде підписане догваріня host city, якє фінально потвердит орґанізацию Ігр на обшыри Малопольщы. Част імпрезы буде проходила в Креници, од 21. червця/юнія до 2. серпня/авґуста будучого рока. В Ледовій Гали пройдут змаганя в джудо і теквондо, на Парковій Горі одбудут ся гірскы бігы і змаганя на роверах МТБ, а на Дептаку брейкінґ. Єст шанса, же в Креници пройдут змаганя в іщы єдній дисциплині. Як подал бургомайстер, в наступных 12 місяцях на обшыри Крениці будут реализуваны великы інвестициі, а самы Ігры то велика шанса на розвиток і промоцию ґміны.

В Креници неодолга одкрыют нову пляжу

Неодолга жытелі Крениці будут мочы скорыстати з іщы єдной новой атракциі. Як подал бургомайстер Пьотр Рыба, нова пляжа на Чорным Потоці буде одкрыта 11. червця/юнія. Подіі мают товаришыти многы культурны і спортовы атракциі. При побудуваных заливовых басенах, маючых забезпечати жытелів перед выливом при більшых дощах ци розтопах, сут тепер рыхтуваны рекреацийны місця. Докола воды была посіяна трава, а на части берега положена ґеотекстиль, на яку пак высыпали пісок. Нижній резервуар буде насыпаный в будучым місяци. Зыйти до нижнього резервуару буде мож по драбинках, а до выжнього достати ся по каменях уложеных в натуральны сходы. Атракция має служыти не лем літом, але і зимом для любителів морсуваня. Цілковитый кошт інвестициі то близко 100 млн зл.

Стріча з авторами альбому «Шляком церкви в ґміні Лабова»

Заряд Товариства Любителів Лабівской Землі просит на стрічу з авторами альбому «Шляком церкви в ґміні Лабова». Авторком фотоґрафій єст Катажына Бєляк, авторком текстів Целіна Цемпа, а вступ написал Станіслав Криціньскій. Стріча одбуде ся в неділю, 22. мая, о 18.00 год. в Ґмінным Осередку Культуры в Лабовій.