Сумар дня на 16. марця 2020 р.

Приносиме вам сумар медияльной ґрупы ЛЕМ.фм+ на ден 16. марця 2020 р.

Рекомендациі од православной вроцлавско-щеціньской єпархіі

На офіцияльным сайті православной вроцлавско-щеціньской єпархіі поміщено інформацию для вірных тыкаючу богослужынь. В звязку з введіньом в Польщы епідемічной загорозы і дотримуючы розпоряджыня державных орґанів з 13. марця тр., што ограничыли чысло участных в згромаджынях до 50-ох осіб, редакция апелює, жебы особы з признаками перестуды, ослаблены, старшы і тырвало хворы, будучы в ґрупі підвысшеного ризика, остали дома і не брали участи во спільных богослужынях. Час проведеный дома повинен быти схоснуваный на особисту молитву і чытаня Святого Писма. Єдночасно – кєд дахто боіт ся о своє здоровля, може остати дома. Тоты, котры берут участ в богослужынях, не мают обовязку цілувати іконы, креста, мощы ци рукы священника. Підходячы до них, мож ся ім поклонити. Тіло і Кров Ісуса Христа, находячы ся в Чашы, не можут быти носителями епідеміі.

В ґорлицкым хыжы під епідемійолоґічным надзором

Шіст домів в ґорлицкым повіті находит ся під епідемійолоґічным надзором в рамках домашньой кварантанны. Моніторуваны сут дві хыжы в Сташківці, три в Лібушы і єдна в Ґорлицях. Поліциянты в мундурах, будучы підпором для санітарных служб, будут хоц раз на ден провіряти, ци особы сут в місци кварантанны і ци не потрібуют помочы. Зобраны інформациі будут передаваны санітарным службам і воєводам. Провіряня мало бы проходити, кєд то можливе, близко місця кварантанны, головні телефонічно, без безпоседенього контаку з особами, якы сут обняты кварантанном. Контакт має быти безпечный так для функцийонарів, як і для осіб ізолюваных. Каждый обнятый домашньом кварантанном мусит быти одповідальный і не выставляти інчых на ризико. Припомнийме, што недотримуваня кварантанны буде каране.

Курорты так само не будут діяти

Часово не будут діяти курорты. В звязку з розпоряджыньом Міністра Здоровля з 13. марця тр., в справі введіня на обшыри Польщы епідемічного стану, од суботы, 14. марця 2020 рока, до одкликаня курорты часово закрывают свою діяльніст. Кєд дахто має скєруваня на курортне лічыня од 14. марця тр., потверджене воєвідскым одділіньом Нацийонального Фонду Здоровля, буде оно мого быти зреалізуване в пізнійшым часі, з затриманьом місця серед ждаючых. Детальны інформациі передают воєвідскы одділіня НФЗ.

Кралицкій без промоциі, але з рецензийом

На основі приказу ґенерального директора Словацкого Нацийонального Музею, Браніслава Паніса, і Музей Русиньской Культуры в Пряшові буде закрытый мінімально до 23. марця того рока. В звязку з тым одкликана была презентация книжкы пн. «Анатолий Кралицкій-Творы» авторства Валерия Падяка і Михала Павлича, яка мала проходити в музею 12. марця. Тым, котры бы хтіли знати веце про тоту публикацию, рекомендуєме прочытати рецензию ред. Петра Медвідя «Кралицкого Творы сут цінном публикацийом про карпаторусиністів». Є она доступна на нашым портали лем.фм.