Сумар дня на 16. лютого/фебруара 2024 р.

Приносиме вам сумар медияльной ґрупы ЛЕМ.фм+ на ден 16. лютого/фебруара 2024 р.

Чемпіонат Світа в альпійскым сновборді на Креницкій Яворині

Уж в будучым тыжни, в вікенд 24. і 25. лютого/фебруара в Креници будут проходити змагяня в рамках Чемпіонату Світа FIS (Медженародной Лыжной і Сновбордовой Федерациі) в альпійскым сновборді. Тоты престіжны медженародны змаганя першыраз в істориі будут розограны в Польшы, як раз на Креницкій Яворині на трасі 2а. Траса єст актуально рыхтувана до змагань. Подля Федерациі то найліпше місце в Польщы, де мож зорґанізувати змаганя. То великє выріжніня для Крениці, котра стане на тот час зимовом столицьом світа. Федерация доцінила великій потенциял Крениці, інфраструктуру вытягів і желізниці, убочы і систем насніжаня. Певністю влине то на звекшыня туристичного руху, як і векшу розпознавальніст курорту, за справом телевізийных трансмісий о світовым засягу.

Лыжный сезон фурт тырват в Малопольщы

Мимо штораз высшых температур в Малопольщы фурт тырват лыжный сезон. Осередкы Польскых Кабельных Желізниц зактуализували доступны трасы м.ін. на Креницкій Яворині, Каспровым Верху ци в Щавници. Дальше мож тіж одвиджати паркы світла на Парковій Горі і Ґубалувці. На Креницкій Яворині любителі лыж і сновборду скорыстают аж з 12 трас, разом долых на близко 14 км. Інчом цікавом зимовом атракцийом в Креници єст Ретро Парк Світла на Парковій Горі. На гору мож ся достати історичныма і одреставруваныма ваґониками до 3. марця в годинах од 10:00 до 21:00. На вершку находит ся Парк Світла з ретро-різбами, котры розсвітлюют каждый ден од 15.00 годины.

Електронічна рекрутация до предшкіль в Польковицях

Як подала Ґміна Польковиці, 1. марця тр. зачне ся електронічна рекрутация на шкільный рік 2024/2025, на вільны місця до предшкільных пляцівок веденых ґміном Польковиці. В рекрутацийным процесі берут участ діти роджены в роках 2021-2018 та діти, котрым одложыли шкільный обовязок. Родиче діти мешкаючых поза ґміном Польковиці можут ся старати о принятя дітины до самоурядовой предшкільной пляцівкы, кєд по завершыню рекрутациі і запевніню місц для діти жытелів ґміны будут іщы свобідны місця. Окрем того до 23. лютого/фебруара родиче діти, котры актуально ходят до предшкільных пляцівок, повинны зложыти деклярацию продолжаючу вчыня на наступный шкільный рік. Незложыня деклярациі в терміні означат резиґнацию з місця в актуальным предшколю.

«Малопольскій білет на фериі»

Припоминаме, што в малопольскым воєвідстві фурт мож скоыстати зо специяльной оферты для діти і молодежы пн. «Малопольскій білет на фериі», то значыт білет за злотівку. Білет придбаный в рамках той оферты буде важный цілый ден до пілночы і дозволит на вельократны переізды в рамках сіти получынь Малопольского Воєвідства. З оферты можут скорыстати діти од 4. рока жытя до початку прирыхтуваня передшкільного, як і діти і молодіж од початку прирыхтуваня передшкільного до завершыня понадосновной школы на основі леґітимациі. Оплата за білет выносит злотівку незалежно од долгости трасы. Білеты сут узнаваны в потягах Малопоьскых Желізниц, POLREGIO і особовых потягах «Шлезскых Желізниц» на одтинку Катовиці-Краків і Катовиці-Закопане. Окрем того позваляют на переізды автобусами Малопольскых Довозовых Леній. Акция потырват до 25. лютого/фебруара тр.