Сумар дня на 16. листопада/новембра 2021 р.

Приносиме вам сумар медияльной ґрупы ЛЕМ.фм+ на ден 16. листопада/новембра 2021 р.

«Никыфор. Маляр над малярями» і выступ ансамблю Руты Увіты в Варшаві 

Припоминаме, же днес в Нацийональным Ентоґрафічным Музею в Варшаві пройде одкрытя выставы пн. «Никыфор. Маляр над малярями». На експозициі запрезентуваных буде веце як 130 творів того знаного в цілым світі непрофесийного артисты. Рисункы походят з колекциі самого Етноґрафічного Музею, котра уважана є за єдну з найбогатшых. Выстава комплексово представлят доробок маляря і обнимат вшыткы темы, якы малювал: ляндшафт, містецку і фантастичну архітектуру, желізницьовы стациі, середины склепів і храмів, фіґуры святых. При образах з колекциі Музею вказаны будут тіж тоты походячы з колекциі Альфонса Карного, выбраны ним особисто в Никыфора, тым ціннійшы, што рідко експонуваны. Творы Никыфора в Варшаві буде мож обзерати 3 місяці, до 27. лютого/фебруара 2022 р. Звиджаня выставы буде доступне для сліпых і слабовидячых осіб. Додатково в рамках выставы 20. листопада/новембра в музею пройде выступ ансамблю Руты Увіты, в репертуарі якого находити ся будут найстаршы, часом уж призабыты лемківскы пісні.

Буде наступный показ пєсы пн. «Бескідскы Дзяды»

На початку листопада/новембра в Высовій мож было обзерати премєру спектаклю зрыхтуваного Театральном Ґрупом «Племя» з Устя Руского. Пєса пн. «Бескідскы Дзяды» мала в собі не лем елементы «Дзядів» Адама Міцкєвича, але і навязувала до «Бескідскых Хронік» Анджея Стасюка, «Пілбасні» Тадеуша Новака та «Бомбля» лемківского писателя Мирослава Нагача. Пєса была барз добрі принята публиком – жытелями Низкого Бескіду, зато рішено повторити спектакль. Вшыткы, котры не могли обзерати премєры пєсы, можут то надробити в суботу 27. aбо в неділю 28. листопада/новембра. Театральну Ґрупу «Племя» основала Моніка Бабуля, котра єст тіж і спілавтором сценария пєсы.

Польско-словацкій «Різдвяный Ярмак» 

Ґміна Зборів просит до участи в інтернетовій подіі «Різдвяный Ярмак ІІ». Стріча пройде 28. листопада/новембра в Дому Культуры. Запрошыня направлене єст предовшыткым на ремісників, народных творців і кружкы заінтересувань, котры будут мати нагоду запрезентувати своі творы і знаня на трансграничній обшыри. Охочы прошены сут выполнити зголошыня і переслати го до 19. листопада/новембра. З ярмаку ведена буде трансмісия, котру мож буде обзерати на інтернетовій плятформі YouTube і інчых порталях повязаных з ярмаком. Подія проходит в рамках проєкту «Карпатска Брама медже Ропом а Зборовом – охорона і розвиток спілной культуровой спадковины на польско-словацкым пограничы».

Остатній одтинок дорогы С3 одданый

В жолтни/октобрі інформували сме, же до руху оддано одтинок новопобудуваной дорогы С3  Польковиці – Любін Пілніч та же онедолга мож буде хоснувати тіж остатній одтинок дорогы. Вшытко пішло згідні з пляном выконавці інвестициі і од 10. листопада/новембра мож уж іздити по остатнім одтинку експресовой дорогы з розвязкы Польковиці Полудне до розвязкы Польковиці Пілніч.

«Цмонтері Ґорлицкой Землі» 

Музей Дворы Карвациянів і Ґладышів просит на выставу знимок пн. «Цмонтері Ґорлицкой Землі». Выстава находит ся в Каштели в Шымбарку і тырвала буде од пятниці 19. листопада/новембра до 15. грудня/децембра тр. Знимкы, котры мож буде обзерати на выставі, походят з музейных збірок.