Сумар дня на 16. листопада/новембра 2020 р.

Приносиме вам сумар медияльной ґрупы ЛЕМ.фм+ на ден 16. листопада/новембра 2020 р.

Ремонт повітовой дорогы но. 1498

Сут пінязі на продолжыня ремонту повітовой дорогы Ропа – Высова – Бліхнарка – Границя Державы. Ґорлицкій Повіт отримал на тоту ціль дофінансуваня з Фонду Самоурядовых Доріг. Заплянуваный до ремонту фалаток має більше як 1,5 км. Повітова дорога но. 1498 має тепер асфальтове покрытя з многыма пошкоджынями, выбоями, пукнінями, стратила форму і вымагат ремонту. Цілковита вартіст будовляных робіт на тым одтинку то більше як 3,88 млн злотых. Дофінансуваня, якє отримал заряд Ґорлицкого Повіту, є в высокости 1,95 млн злотых. Підписаня догваріня з выконавцьом пройде на зламі листопада/новембра і грудня/децембра тр. Закінчыня прац єст плянуване на май 2021 р.

Модернізация Ґорлицкого Центра Культуры

Під конец мая тр. Містецкій Уряд в Ґорлицях інформувал, што місто достало дофінансуваня в высокости 75% коштів кваліфікуваных на тото, жебы модернізувати Ґорлицкій Центр Культуры. Ґенеральный ремонт має ся зачати в будучым році, а його кошт то близко 8 мілийонів злотых. В четвер, 12. листопада/новембра, в Кракові бургомайстер Ґорлиц Рафал Кукля підписал догваріня на дофінансуваня тых робіт. Будинок Ґорлицкого Центра Культуры буде м.ін. достосуваный до потреб неполносправных осіб, модернізуваны будут видовискова саля, сцена і єй елементы, побудувана буде нова кінова саля, кавярня і гостинны ізбы для артистів. Наступным пунктом в реализациі задачы будут конкурсы оферт.

Ремонт дорогы в центрі Ґорлиц

Як інформує Містецкій Уряд в Ґорлицях уж неодолга дорога в самым ценрі, тє. одтинкы улиц Міцкєвича і Стружівской будут змодернізуваны і отримают нове, асфальтове покрытя. Місто на іх ремонт достало 50% середків кваліфікуваных в рамках Фонду Самоурядовых Доріг, в высокости 623 301 злотых. Ціковита вартіст задачы то 1 246 602 злоты. Працы будут ведены на фраґменті дорогы од скрижуваня з улицями Краківском і Колонтая до скрижуваня з ул. Бліх.

Пішо-роверова стежка Санкова-Вапенне

Тырвают роботы над пішо-роверовом стежком, яка поучыт Санкову і Вапенне. Пут буде мала більше як 3,7 км долгости, а на трасі штырі пресідковы пункты типу B&R. Закінчыня робіт о вартости білше як 2,5 млн злотых єст плянуване на липец 2021 рока. Інвестиция єст частю партнерского проєкту пн. «Розбудова систему еколоґічного транспорту способом на зменшыня занечыщыня повітря і высшый комфорт подорожуваня в функцийональній обшыри міста Ґорлиці». Проєкт єст спілфінансуваный з Реґіонального Операцийного Проґраму Малопольского Воєвідства на рокы 2014-2020.

Конкурсы для діти од Стоваришыня «Руска Бурса»

Припоминаме, же Стоваришыня «Руска Бурса» в Ґорлицях просит до участи в плястичным і літературным конкурсі. До выграня барз атракцийны нагороды. Того рока проходит сотна річниця народжыня лемківской поетесы Меляніі Собин. З той нагоды просиме охочы діти (до 9 рока жытя) намалювати образок (свобідном техніком), котрый буде інтерпретацийом выбраного верша Собин. Для старшых учеників пропонуєме конкурс, в котрым можут выказати ся свойом креативністю в писаню. Задачом є написати твір на тему «Скарб мойой бабы/ мого діда», в котрым опишут тото, што є цінным для іх прародичів, чому не дадут пропасти, што хотят сохранити. Творы оцінюваны будут в двох катеґориях: школярів в віку 10-12 років та 13-15 років. Найліпшы творы будут опубликуваны на сайті лем.фм, де найдете тіж деталі і реґулямін конкурсу. Конкурсовы праци можете высылати до 30. листопада/новембра.