Сумар дня на 16. липця/юлия 2024 р.

Приносиме вам сумар медияльной ґрупы ЛЕМ.фм+ на ден 16. липця/юлия 2024 р.

Тирвают консультациі про будучый проґрам Interreg

Ґміна Санкова просит жытелів і представників ріжных інституций до участи в консультациях тыкаючых будучого проґраму трансграничной спілпрацы на польско-словацкым пограничы Interreg. До той поры при фінансовым спертю з проґраму вдало ся одкрыти много кілометрів туристичных шляків, одновити понад 400 обєктів інфраструктуры ци змодернізувати близко 200 км доріг. Консультациі ведены сут через Спільный Секретарият Проґраму, а цілю єст зобраня опініі і уваг што до будучой едициі проґраму, котра зачне ся в 2027 році. Анкєта кєрувана єст особливо до жытелів погранича, але выполнити можут ю вшыткы заінтересуваны розвитком польско-словацкого пригранича. На сайті ґміны санкова находят ся два мотузкы, першый до анкєты зрыхтуваной для інстистуций, а другій для жытелів і заінтересуваных. Анкєту мож выполнити до кінця серпня/авґуста.

В Мушыні рыхтуют новы атракциі, град буде богатшый о мультімедияльну експозицию і активне дзеркало

Як поінформувал бургомайстер Мушыны Ян Ґольба, в змодернізуваным ґраді возникне мультімедияльна експозиция вказуюча історию Мушыньской Державы і погранича. Нова атракция буде лучыла в собі історичны факты з леґендами і оповіданями. Выстава презентувана буде при выкорыстаню модерной технолоґіі як голоґрамы ци мультімедияльны дзеркала разом з клясичныма способами переказу інформациі. Реализация задачы буде можлива завдякы дофінансуваню з польско-словацкого проґраму Interreg. Актуально тырват конкурс оферт на реализацию выставы, котра быти може уж о рік буде доступна для туристів. То єднак не конец новых атракций, бургомайстер передал, што в плянях находит ся тіж уставліня на подворци активного дзеркала, котре получыт ґрад в Мушыні з тым в Старій Любовни. Оба порталі дозволят не лем обзерати в реальным часі, што діє ся в сусіднім обєкті, але туристы будут мочы аж і зо собом побесідувати.

В тоту неділю рушыт XIII Етноґрафічный Роверовый Райд Слідами проф. Романа Райнфуса

Музей Дворы Карвациянів і Ґладышів в Ґорлицях, одділіня Скансен Погіряньского Села в Шымбарку просит на шторічный роверовый райд. Подія пройде в неділю, 21. липця/юлия. Хто має дяку взяти участ в XIII Етноґрафічным Роверовым Райді Слідами проф. Романа Райнфуса, має до выбору 4 трасы долгости 60, 45 або 7 км, якы мают ріжный рівен трудности. Найдолша та найтруднійша траса веде через лемківскы села, зачынат ся в Ґорлицях і іде м.ін. через Санкову, Кункову, Устя Рускє ци Лося. Для каждой з трас метом буде Скансен Погіряньского Села в Шымбарку. Тогорічный ліміт участників то 100 осіб, а кошт вписового то 15 зл. Інтернетовый формуляр зголошынь і вымаганя трас находят ся на офіцийным сайті Музею Дворы Карвациянів і Ґладышів та на сайті gorlicebike.pl. Зголошувати мож ся лем до 17. липця/юлия.

Карпатскій курс- про кухню, тракцтво і біжутерию з Карпат

Карпатскій Народный Університет просит до участи в Карпатскым курсі. Подія обнимат пят вікендовых стріч, разом то аж 80 годин варштатів. Кажда зо стріч присвячена буде інчій темі, перша про карпатску кухню, а наступны будут про ткацтво, різбліня, варштаты лінорыту і остатні про пацюркову біжутерию. Стрічы складают ся з теоретичной і практичной части. Оплата за курс то 100 зл, в тым єст нічліг, ідло і убезпечыня. Чысло місц огранычене, а формуляр до зголошыня находит ся на сайті Карпатского Народного Університету. Записати мож ся до 17. липця/юлия.