Сумар дня на 16. квітня/апріля 2020 р.

Приносиме вам сумар медияльной ґрупы ЛЕМ.фм+ на ден 16. квітня/апріля 2020 р.

Обовязок закрывати уста і ніс

Припоминаме, што од днес на обшыри цілой Польщы є обовязок закрывати уста і ніс в публичным просторі. Як інформує уряд влады Польской Республикы, кажда особа в публичным місци буде мусіла носити охоронну маску, шалик або хустку, што закрыют уста і ніс. Обозяком обняты сут вшыткы особы, якы находят ся на улицях, в урядах, склепах ци в місцях роботы. Заєдно уряд продолжыл до неділі, 19. квітня/апріля, значыт Великодня за юлияньскым календарьом, м.ін. ограничыня звязаны з переміщаньом ся ци громаджыньом в храмах – тепер максимально в святыни може быти 5 осіб. До 26. квітня/апріля закрыты будут школы і університеты, аеропорты і медженародный желізницьовый рух. До неділі 3. мая будут закрыты державны границі. До одкликаня обовязуют ограничыня тыкаючы орґанізациі масовых імпрез і згромаджынь.

Выстава писанок онляйн

Выгорлятскій Музей в Гуменным і того рока орґанізувал медженародну конкурсово-презентацийну выставу крашеных яєц «Карпатска Писанка 2020». 28. річник той подіі мал быти про одвиджаючых музей доступный од 12. марця до 26. квітня/апріля. Зо взгляду на пандемію коронавіруса тогорічна выстава остала без вернісажу і оголошыня результатів конкурсу. Не мож одвиджати музей, жебы посмотрити на авторскы працы, котры того рока в рамках подіі были присланы на конкурс. Але музей вышол з пропозицийом про каждорічных любителів акциі і вшыткы роботы удоступнил онляйн. Презентувану колекцию творит понад тисяч писанок і великодніх декораций веце як стох авторів з ріжных реґіонів Словациі, Польщы, Мадяр, Румуніі і штату Пенсильванія в ЗША. Писанкы з Украіны были з причыны рестрикций односно коронавіруса за границями. Колекцию тогорічной «Карпатской Писанкы» можете видіти на сайті www.muzeumhumenne.sk.

Нелеґальне перекрочыня границі в Конечні

Словацкы громадяне нелеґально перекрочыли словацко-польску границю в неділю, 12. квітня/апріля, на переході в двох русиньскых селах Бехерів (од словацкой страны) і Конечна (од польской). Перед полудньом функцийонеры, котры тымчаосово ведут граничны контролі, спостерегли двох мужчын, котры нелеґально перекрочыли границю. Нашли іх коло граничного знаку, якій находит ся уж по польскій страні, на обшыри Конечной. Словацкы громадяне то мужчыны в віку 37 і 48 років. Ішли лісом. Граничным службам освідчыли, што выбрали ся лем на прогульку, жебы посмотрити приграничный воєнный цмонтір з І світовой войны, якій находит ся над Конечном. Одраз по іх затриманю до Конечной приіхали пожарникы з Ґорлиц, котры провели санітарну контролю словацкых громадян. Мужчыны были покараны на основі польского кодексу выкрочынь. Пополудни в реґіоні переходу Барвінок-Вышній Комарник были они выданы словацкым службам і мусят тепер быти в 14-дньовій кварантанні.

Помали ближыт ся конец ремонту дорогы в Санкові

Перед Великодньом за григорияньскым календарьом завершено основны ремонтово-будівляны роботы на воєвідскій дорозі но. 977 на высокости Санковой, при крижівці на Мацину і Вапенне. До хоснуваня оддано новопобудуване рондо, через котре можут уж ходити автомобілі, а неодолга тіж біциґлі. Одкрытя ронда мало ся одбыти уж пару місяци тому, але інвестиция ся міцно запізнила. Ремонт в Санковій мал офіцияльно ся скінчыти в жолтни/октобрі 2019 р. Покля што дальше не знатя, коли інвестиция буде цілковито закінчена. Окрем нового ронда побудуваный был новый і векшый міст на ріці Санківка. Війт ґміны Санкова Малґожата Малух помістила в социяльных медиях короткє фільм з подорожы новым мостом і рондом.