Сумар дня на 16. червця/юнія 2023 р.

Приносиме вам сумар медияльной ґрупы ЛЕМ.фм+ на ден 16. червця/юнія 2023 р.

81. пленарне засіданя Спільной Комісиі Уряду та Нацийональных і Етнічных Меншын

На офіцияльным інтернетовым сайті Польской Республикы явила ся інформация про 81. пленарне засіданя Спільной Комісиі Уряду та Нацийональных і Етнічных Меншын. Єст оно заплянуване на 5. ден липця/юлия на 9.00 год. Представлено і пропонуваный порядок засіданя. В першій части стрічы Спільна Комісия буде бесідувала м.ін. на тему можливости звекшыня середків на реализацию в 2023 р. задач маючых на ціли охорону, захованя і розвиток культуровой достоменности нацийональных і етнічных меншын та захованя і розвиток реґіонального языка. Буде і передана інформация о дрібницьовых принципах поступуваня при уділяню дотаций на реализацию такых задач в будучым році. Буде порушена і тема актуального стану і перспективы змін вчыня німецкого як меншынового языка. В другій части стрічы плануют медже інчыма омовити механізмы возниканя і формуваня авдиций для нацийональных і етнічных меншын в публичных медиях. В тій справі выступлят представникы Державной Рады Радия і Телевізиі і Рады Нацийональных Медий. Буде і подана інформация на тему стану прац над опрацуваньом ІХ Рапорту тыкаючого ситуациі нацийональных і етнічных меншын та реґіонального языка в Польскій Республиці.

Од липця/юлия буде ходил автобус Бардиів – Крениця

Добра віст для тых, якы ждали на одкрытя автобусового получыня медже Креницьом а Бардийовом. Вкінци, по парох роках старань, ленію поведе ся урухомити. Буде мож з ней скорыстати уж в будучым місяци. Трансграничный автобус Бардиів – Крениця одкрыє Пряшівскій Самосправный Край уж од 1. липця/юлия. Стараня, жебы урухомити автобусове получыня медже Креницьом а Бардийовом зачали ся іщы в 2017 році. Товды не позваляли на тото словацкы переписы. Мимо іх зміны, іщы пару місяців тому перспективы на урухомліня получыня в тым році были барз планны. Хоцкы были вшыткы потрібны згоды, то перешкодом была політична криза словацкого уряду і проблемы з фінансуваньом ґмін, зато не знатя было, коли получыня буде фінально одкрыте. На приспішыня його старту можливо влинула соспільна пресия, в тым громадяньска петиция до пряшівского жупана Міляна Маєрского, жебы як найскорше урухомити автобусы. Згідно з транспортовым пляном ПСК, в плянах єст і получыня на трасі Стара Любовня – Пивнична. Трансграничны получыня мали бы принести значучы синерґічны ефекты в економічній, соспільній і культурній сферах обох реґіонів.

В Біловежы припомнут двох нашых будителів

Припоминаме, што в найблизшу неділю, 18. червця/юнія в русиньскым селі Біловежа на Пряшівщыні одбудут ся подіі посвячены двом нашым Будителям – Духновичови і Павловичови. Подіі зачнут ся о 13.00 год. од положыня квітя під памятниками Александра Духновича і Александра Павловича. Пак пройде сельскій хоровід, а о 14.00 год. зачне ся культурный проґрам на ареалі сельского уряду в Біловежы. Выступлят м.ін. PUL’S з Пряшова, Варвінок з Камюнкы, Сестры Ковачовы ци Біловежанка.

Народный Выступ Русинів на Град Маковиця

А на заран, в суботу. 17 червця/юнія, Русиньска Оброда на Словациі разом з Селом Зборіб і Здружыньом на Охорону Зборівского Граду просят на Народный Выступ Русинів на Град Маковиця. Подія зачне ся о 13.00 год. на Парковиску під градом Зборів в селі Долга Лука. В проґрамі єст культурный проґрам, реферат о Русинах на Маковици і товаришучы активности.

Фот.: gov.pl