Сумар дня на 15. серпня/авґуста 2023 р.

Приносиме вам сумар медияльной ґрупы ЛЕМ.фм+ на ден 15. серпня/авґуста 2023 р.

Русины не были запрошены на консультациі з меншынами в Закарпатскій области

Закарпатска областна воєньска адміністрация поінформувала 8. серпня/авґуста на своім офіцияльным сайті, што в тот ден Закарпатска област стала першым реґіоном Украіны, де выстартували консультациі з представниками нацийональных комуніт. Припомнийме, же рішыня меншыновой політікы єст медже першыма семома рекомендациями, котры Украіна повинна сполнити, жебы мочы дальше старати ся о вступ до Европейской Уніі. За нашыма інформациями – представникы Русинів не были запрошены на речену стрічу. Припоминаме, же хоцкы Русины не сут вызнаны на цілодержавным рівни на Украіні, то в закарпатскій области Украіны, рішыньом депутатів Закарпатской Областной Рады, Русины сут вызнаны як єдна з нацийональности, котры в тій области жыют од марця 2007 рока. До Адміністрациі Закарпатской областной воєнной адміністрациі звернул ся електронічном почтом редактор нашого радия, єднак одповіди на звіданя м.ін. о причыну того, же Русины не были запрошены на стрічу, сме не отримали. Веце на тоту тему чытайте в статіі на нашым портали.

Закрытый одтинок повітовой дорогы 1503К Фльоринка – Ізбы 

Повітовый Дороговый Заряд в Ґорлицях поінформувал, што в звязку з аварийом деревяного мосту на трасі повітовой дорогы 1503К Фльоринка – Ізбы в місцевости Снітниця буде введена часова зміна орґанізациі руху. Дорога на одтинку в км 9+100 – 9+200 буде закрытa для руху для авт од 16. серпня/авґуста на час ведіня робіт. Вызначеный єст обізд воєвідском дорогом 981, повітовыма дорогами 1498 К, 1500К, 1503К, 1504К, 1510К і ґмінныма дорогами в Чырній і Баници, через Баницю, Чырну, Берест, Поляны, Фльоринку, Вавку, Ропу, Брунары і Снітницю.

Русиньска Мукачівска Грекокатолицка Єпархія перейде на новый стиль календаря

Мукачівска грекокатолицка єпархія остаточно перейде од 1. вересня/септембра на григорияньскій календар. Русиньска Мукачівска Грекокатолицка Єпархія єст окремом єдиницьом, яка не належыт під Украіньску Грекокатолицку Церков і сама рішат о переході на новый календар. Мукачівска єпархія зачала процес зміны календаря іщы в минулым році, коли за переходом на новый стиль календаря оповіло ся понад 90% вірных. Дальшы анкєты в поєдных парохіях вказали, што більшіст вірных (понад 95%) была за переходом на григорияньскій календар.

Русиньскій одпуст на Мадярах

Традицийно, кінцьом серпня/авґуста русиньскы грекокатоликы на Мадярах стрітят ся в селі Шайовпальфала на русиньскым одпусті, де ся будут молити ґу Павловскій чудотворній іконі Пресвятой Богородиці. Одпуст одбуде ся в неділю 27. серпня/авґуста. По утреніі буде служена торжественна літургія, яку очелит мішкольцскій єпарха владыка Атаназ Ороз. Орґанізаторами одпусту сут Русиньскє Самосправуваня Шайовпальфалы, Вседержавне Русиньскє Самосправуваня, вєдно з дальшыма русиньскыма самосправуванями і орґанізациями. Головным прокровительом русиньского одпусту єст Віра Ґіріц, посланкыня Парляменту Мадяр за Русинів. О Павловскій чудотворній іконі Пресвятой Богородиці прочытате в дописі на нашым портали.