Сумар дня на 15. серпня/авґуста 2022 р.

Приносиме вам сумар медияльной ґрупы ЛЕМ.фм+ на ден 15. серпня/авґуста 2022 р.

Каменярскы варштаты на Лемковині

Уж на початку вересня/септембра мож буде взати участ в черговых каменярскых варштатах орґанізуваных Лемківскым Ансамбльом Пісні і Танця Кычера. В тогорічній едициі працы будут проходити на цмонтери в Лабовій, але окрем того першыраз діяня будут розшырены о стары лемківскы памятникы на цмонтери в Чырній. Тоты, якы хотят сперти акцию через веце як єден ден, прошены сут о контакт через фейсбуковый сайт Каменяре Кычеры або высланя зголошыня на майльовый адрес remontlabowa@gmail.com. Орґанізаторы забезпечают нічліг і ідло.

Обсерватория в Розтоках буде мала вымінену стріху

Обсерватория в Розтоках, в окресі Свидник, котра была побудувана в 30. роках, буде мала вымінену стріху. Обсерватория є специялистичным одділіньом Піддукляньского Освітнього Центра в Свиднику, служыт заінтересуваным астрономійом як простір про фаховы активности і закватеруваня. Реконструкция стріхы зачне ся в вересни/септембрі і буде сфінансувана Пряшівскым Самосправным Крайом, якій заряджат інституцийом. Кошт робіт то разом 200 тис. евро. За Леом Геіловом з Одділіня Комунікациі і Пропаґациі Пряшівского Самосправного Краю, реконструкция мала бы быти закінчена до кінця того рока.

Працы Никыфора мож обзерати во Влоцлавку

Працы єдного з найвызначнійшых лемківскых артистів, славного маларя-примітивисты Никыфора (Епифана Дровняка) мож обзерати во Влоцлавку. Вернісаж выставы прошол 12. серпня/авґуста і буде єй мож іщы обзерати долше як три місяці, до 20. листопада/новембра. «Никыфор з колекциі Боґдана Якубовского» то найовша выстава в оферті Музею Куявской і Добжыньской Землі. Є то приватна колекция, яка ниґда перше не была вказувана шыршій публиці. Часто сут то вчасны творы артисты. В збірці находят ся ляндшафты з архітектуром, містны будинкы і церкви. Є і рідкє для того артисты писмо-прошыня оздоблене малом акварельом.

Стрічы з природом в Маґурскым Нацийональным Парку

Фурт тырвают літні стрічы з природом орґанізуваны Маґурскым Нацийональным Парком. Од початку вакаций кажду середу проходят природничы варштаты для діти в Едукацийно-Музеальным Осередку МНП в Крампній. Занятя пройдут і тоту середу од 10.00 до 12.00 год. Чысло участных єст лімітуване, зато треба ся перше записати. Для дорослых і родин Парк зрыхтувал чергову прогульку по парку, яка ся зачне заран о 9.00 год. при цмонтери в Жыдівскым – трасі на Высокє. Додатково парковый едукатор буде присутный на трасі Жыдівскє – стежка «Кычера» – Высокє в год. од 8.00 до 14.00. Участ в активностях єст безплатна, але треба памятати, же особы ідучы на прогульку до Парку мусят заплатити вступне.