Сумар дня на 15. марця 2022 р.

Приносиме вам сумар медияльной ґрупы ЛЕМ.фм+ на ден 15. марця 2022 р.

Ансамбль Терочка достал дофінансуваня на закуп облечынь

11. марця оголосили результаты проґраму ЕтноПольща орґанізуваного Нацийональным Центром Культуры. Реализуваный він єст од 2018 р., а його цілю єст підтримувати локальны і культуровы достоменности та творити можливости до участи в культуральным жытю так на селі, як і в місті. До тогорічной едициі проґраму зголошено близко 1500 внесків, з чого 300 отримало дофінансуваня. Серед выріжненых нашол ся тіж внесок Стоваришыня «Руска Бурса» в Ґорлицях на закуп лемківского облечыня для діючого при орґанізациі ансамблю Терочка. Дофінансуваня, в квоті 39 тис. зл, презначене буде на кроі так для старшой ґрупы Терочкы, як і той молодшой. Більшіст дофінансуваня піде на закуп ґорсетів для дівчат зо старшой ґрупы ансамблю. Буде тіж дашто для мужчын, котры облечыня мают уж праві комплетне, прикрасят іх ремені і калапы. Як іде о молодшу ґрупу – куплены будут основны части облечыня: оплічата і кабаты для дівчаток і кошелі з лайбиками дла хлопців.

Zadanie pn. Zakup łemkowskich strojów ludowych dla zespołu „Teroczka” dofinansowano ze środków Ministra Kultury i Dziedzictwa Narodowego w ramach programu Narodowego Centrum Kultury: EtnoPolska. Edycja 2022

Орґанізаторы Кромер Фестіваль Біч потвердили тогорічну 8. уж едицию фестівалю

Ґміна Біч та Бічскій Культурный Центр і того рока зорґанізуют єден з найбарже знаных в Польщы фестіваль давной музикы,Кромер Фестіваль Біч. Тогорічна едиция пройде під гослом «Метаморфозы». Як пояснят артистичный директор фестівалю, Павел Щепанік, подія з року на рік ся змінят і то єст добре, такы зміны треба вказати. Уж влони орґанізаторы старали ся удоступнити концерты шыршій публиці, а як заповіли – того рока хотят зробити іщы більше в тій квестиі. Додатково надіют на розшыріня фестівалю і зорґанізуваня хоц єдного з концертів в інчій ґміні ґорлицкого повіту. На тоту хвилю орґанізаторы подіі не здраджают тогорічного проґраму, але уж тепер просят резервувати остатній вікенд липця/юлия на спільну стрічу з музиком.

В Креници рыхтуют нову атракцию для туристів і жытелів міста – басен на Чорным Потоці

Актуально будуваны на Чорным Потоці сут заливовы басены, котры забезпечат мешканців перед выливом при більшых дощах ци розтопах. Не єст то єднак конец прац заплянуваных при воді. Онедолга в корыті потока возникне тзв. басен глубокости до 1,2 м, а пак зачнут ся роботы звязаны зо створіньом рекреацийных місц над ним, такых як пляжы. Бургомайстер Крениці підкрислил, што атракция буде служыла не лем літом, але тіж зимом для любителів морсуваня. За пляном має то быти доступне до хоснуваня од червця/юнія тр. Кошт інвестициі то коло 100 млн зл.

Ніч Совы, дашто для любителів нічных прогульок

Маґурскій Нацийональный Парк разом зо стоваришыньом «Jestem na pTak!» просят 19. марця на Ніч Совы 2022. В рамках стрічы одбуде ся прелекция на тему тых птахів та нічна прогулька, в часі котрой учасникы будут мочы слухати одголосів нічных птахів. Подія зачне ся о 18.00 год. в Вапенным. Чысло місц ограничене – орґанізаторы просят скорше ся зголошувати. Дрібниці находят ся на фейсбуковым фанпейджы МНП.