Сумар дня на 15. лютого/фебруара 2024 р.

Приносиме вам сумар медияльной ґрупы ЛЕМ.фм+ на ден 15. лютого/фебруара 2024 р.

«Лемковино, краю рідный»

Центр Культуры в Креници уж заран, в пятницю просит на выняткову стрічу з лемківском культуром, яку названо «Лемковино, краю рідный». Вчас подіі одбуде ся стріча з Ігорьом Гербутом і Петром Мурянком. Гербут, як знаный на польскій музичній сцені вокалиста запрезентує ся од стороны свого лемківского походжыня, а Петро Мурянка представит свою поезию, кєд же є єденым з найвыдатнійшых сучасных лемківскых творців і діячів культуры. Своі фороґрафіі запрезентує і третій здібный Лемко – фотоґрафік Петро Басалыґа. Стріча зачне ся о год. 18:30 в бальовій сали Старого Здройового Дому. Перед стрічом, о 15.00 год. буде можніст видіти безплатно фільм «Мій Никыфор». Подія є реализувана в рамках проєкту Скарбы Ґуралів споза Подгаля, котрого лідером є Фундация Мапа Пасий.

ПСК хоче противдіяти наглым заливам

Пряшівскій Самосправный Край (ПСК) хоче рішыти в справі повторюючых ся залив на своій териториі. Цілю помочы жытелям постраждалых области в минулым році самосправа вступила до медженародного проєкту Flopres. Споминаный проєкт замірює ся на превенцию і предповіданя наглых залив. Flopres уможливит на пілотных заливах ПСК і на польскым боку выбудувати комплексовый систем про підпору менаджменту заливовых ризик і тіж жданя перед наглыма заливами. Конкретно іде о екстерный систем заложеный на WEB GIS технолоґіі. Проєкт Flopres в сумі 346 тис. евро реализує ся в періоді трьох років через ґрантовый проґрам LIFE, котрый є інструментом Европеской Уніі.

Польковиці рекрутуют першокласників

Як інформує ґміна Польковиці, од 1. марця зачне ся рекрутация до І кляс, на шкільный рік 2024/2025, до основных шкіл веденых польковицком ґміно. Рекрутация одбуде ся онляйн. До І клясы приниманы будут 7-літні діти, обняты шкільным обовязком, а тіж 6-літні. Рекрутация выстартує о 8:00 год. рано. Діти, якы жыют в обшыри даной школы, можут быти зголошены родичами або опікунами о принятя до І класы (потрібне є освідючыня о місци замешканя). Родиче годны старати ся о принятя дітины до інчой школы, значыт поза обшыр, де мешкают. Результаты рекрутациі будут поданы в формі списку закваліфікуваных і незакваліфікуваных кандидатів до принятя.

Премєра в Театрі Духновича

A уж заран в Театрі Александра Духновича в Пряшові одбуде ся дальша премєра в тым театральным сезоні. Драматичный колектив одпремєрує інсценізацию єдного з найвызначнійшых драматичных текстів ХХ ст. – «Чеканя на Ґодота», од ірляндского драматурґа Самуеля Бекетта. Режысерию абсурдной драмы зробил гостинні Растислав Баллек, котрый уж колиси з русиньскым театром спілпрацувал. Умелецка шефка ТАД Людмила Лукачікова повіла, же Василь Русиняк, котрый грає Владиміра, і Осиф Ткач, котрый є в пєсі Естраґон, дістали в тых красных акторьскых ролях подарунок ку іх жытьовым ювілеям. Дальшы ролі в новій інсценізациі мают Осиф Пантликаш, Євгеній Либезнюк і Зденка Кваскова. Переклад пєсы на русиньскій язык зробил Валерій Купка. Премєра одбуде ся на Великій сцені о 19.00 год., друга премєра буде в середу 21. лютого/фебруара. Інсценізация є спілфінансувана з Фонду на підпору культуры нацийональных меншын.