Сумар дня на 15. лютого/фебруара 2021 р.

Приносиме вам сумар медияльной ґрупы ЛЕМ.фм+ на ден 12. лютого/фебруара 2021 р.

Словация закрыват границі

Зміняют ся принципы візду і транзиту через обшыр Словацкой Республикы. До 15. лютого/фебруара особовый рух медже Польщом а Словацийом проходил без граничной контролі, вшыткы граничны переходы были одкрыты. Од 6.00 рано днес, 15. лютого/фебруара, по словацкій страні ведены сут збільшены контролі дотримуваня ограничынь в свобідным переміщаню ся по обшыри Словациі і принципів візду з заграниці. В звязку з тым граничны переходы м.ін. в Радошыцях, Ожынній, Мушынці, Лелюхові ци Щавници будут закрыты для особового і товарового руху. До 6.00 рано 17. лютого/фебруара чужынці, в тым громадяне Польщы, Австриі, Чех, Мадяр і Украіны, мусят при візді до Словациі подати неґативный результат тесту RT-PCR на присутніст коронавіруса, або антиґенового тесту зробленого на обшыри Австриі або Чех. В інчым припадку мусят ся зареґіструвати на обовязкову домашню кварантанну. Од 6.00 рано 17. лютого/фебруара громадяне Польщы будут іти на кварантанну, домашню або в державных осередках, по скорійшій обовязковій реґістрациі. Звільнены з кварантанны сут м.ін. водителі товарового транспорту і автобусів, обслуга аероплянів і желізниці та медичны службы.

Стріча маршалків з властями ґмін Ґорлицкой Землі

В пятницю, 12. лютого/фебруара, в Ґорлицях Маршалок Малопольского Воєвідства Вітольд Козловскій і Віцемаршалок Лукаш Смулка стрітили ся з властями ґмін Ґорлицкой Землі. На стрічы представникы Заряду Ґмін Ґорлицкой Землі дискутували такы темы як проблем занечыщыня повітря, будовы водопроводів і дороговой інфраструктуры. Головным пунктом стрічы было переданя Маршалком Малопольского Воєвідства умовы на будову Зоны Економічной Активности на рукы Бургомайстра Ґорлиц Рафала Куклі. Цілковита вартіст проєкту то понад 7 млн злотых, з чого веце як 5 млн злотых покрыє дофінансуваня. Реализация проєкту має позитивно влинути на економічный розвиток міста. В плянах єст выпосажыти Зону в необхідну до єй фунґуваня інфраструктуру і побудувати внутрішній систем комунікациі, тє. внутрішні дорогы зо зъіздами, паркінґовы місця, маневровый пляц і тротуар.

Мож зголошувати увагы до постановы в справі поділу Малопольщы на обшыри для полювань

Тырвают консультациі над поділом малопольского воєвідства на обшыри для полювань. Жытелі можут складати внескы до четверга, 18. лютого/фебруара. Маршалок Вітольд Козловскій удоступнил для публичной відомости проєкт постановы воєвідского соймику в справі поділу Малопольщы на 242 обшыри для полювань, мож го видіти на інтернетовым сайті уряду. Увагы до проєкту постановы може внести каждый властитель або постійный хоснуватель нерухомости обнятой проєктом. Увагы мож высылати на писмі або електронічно на адрес Департаменту Рільництва і Розвитку Сельскых Обшыри Маршалівского Уряду Малопольского Воєвідства. Внескуючы мусят мати нерухоміст зо «специяльныма властивостями» або вести діяльніст, яка істо утруднят господарку для полювань, або котра єст з причыны єй ведіня сильно ограничена або неможлива. Еколоґы підповідют, як вылучыти свою землю з полювань. Взоры внесків удоступняют м.ін. на вебсайті www.zakazpolowania.pl. Подля них вымогы сполняют м.ін. зо взгляду на безпеку вшыткы властителі, што ведут аґротуристичну ґаздівку, рекреацийну, туристичну або едукацийну діяльніст, ци властителі, якы тримают звірята, котры можут быти в наслідстві полюваня страшены або наражены на постріліня.

В Ґорлицях станул контенер на накруткы

В Ґорлицях станул контенер в формі серця, презначеный до збіркы плястіковых накруток. Акциі іх зберяня од давна ведены сут в школах і інчых інституциях, а грошы з іх продажы в скупі передаваны сут на ріжного рода благодійны акциі, як збірка на інвалідскій візок, ци сфінансуваня лікуваня для потрібуючых. Одтепер плястіковы накруткы буде мож давати і до серця при ул. Яґєллы в Ґорлицях. Дохід з іх продажы буде презначеный для найбарже потрібуючых. Збераня має тіж додатково еколоґічный характер – накруткы перерабляны сут пак на вторичну суровину, што ся причынят до зменшыня плястіковых одпадів.