Сумар дня на 15. листопада/новембра 2021 р.

Приносиме вам сумар медияльной ґрупы ЛЕМ.фм+ на ден 15. листопада/новембра 2021 р.

Новелизация закону о радийофоніі і телевізиі

Важны зміны в законі о радийофоніі і телевізиі. Закон од листопада/новембра тр. заказує поміщати в авдициях контент, котрый бы кликал до ненависти, насильства, або дискримінуючый зо взгляду на расу, кольор скоры, сексуальніст, етнічне або социяльне походжыня, ґенетичну характеристику, язык, реліґію або переконаня, погляды, державну приналежніст, приналежніст до нацийональной меншыны, маєток, вроджыня, неполносправніст, вік або сексуальну орієнтацию, як тіж контент, што закликує до злочыну о террористичным характері. Оціна, ци контент єст згідный з обовязуючым законом, остає в компетенциях Ведучого Державной Рады Радийофоніі і Телевізиі. Окрем пошыріня записів о дикримінациі, новелизация закону о радийофоніі і телевізиі вводит м.ін. записы маючы дати рівный доступ до інформаций і комунікациі неполносправным особам. Од 1. листопада/новембра тр. комунікаты надзвычайного характеру, в тым публичны комунікаты тыкаючы пандеміі ци выняткового стану, повинны быти тлумачены на польскій язык міґовый, мати написы або авдийодескрипцию.

Одтворят цмонтері з І світовой войны

Ґміна Санкова оголосила конкурс оферт на комлексовы працы на цмонтерях з І світовой войны. Іде о цмонері в Чорным, Бортным, Рыхвалді, Мацині Великій і Вапенным. Плянуваны працы мают обняти шор задач: од консервациі істнуючых елементів по одтворіня знищеных мурів, елементів архітектуры, огороджыня, памятниковых цоколів і самых памятників. Вшытко згідно з рекомендациями консерватора забытків. В оголошеным документі находят ся дрібницьовы описы прац, якы мают быти выконаны на каждым з цмонтерів. Роботы будут ведены в рамках проєкту «Сохранити перед забытьом – зміцняня трансграничной дідовизны через ревітализацию некрополий І світовой войны польско-словацкого погранича». Разом по обох странах границі має быти одновленых 26 цмонтерів.

Перервы в доставі електричной енерґіі в ґорлицкым повіті

Tauron заповіл на тот тыжден аж і паругодинны перервы в доставі електричной енерґіі в некотрых місцевостях в ґорлицкым повіті. Хто має пец на центральне огріваня, мусит быти готовый на перервы в огріваню. В віторок, 16. листопада/новембра, енерґіі може бракувати в Устю Рускым, Климківці – Станици Водній і Вільчысках. О ден перервы в доставі плянуваны сут в Бортным і части Ґорлиц. В четвер, 18. листопада/новембра, енерґіі бракне в місцевостях Климківка і Шымбарк.

Тырват ремонт повітовой дорогы нр 1510 К Берест – Мохначка Выжня

Як сме уж перше інформували за Повітовым Зарядом Доріг в Новым Санчы, од віторка 16. до пятниці 19. листопада/новембра тр. в год. од 8.00 до 18.00 ведены будут працы звязаны з ремонтом повітовой дорогы нр 1510 К Берест – Мохначка Выжня. В звязку з тым в днях 16. і 17. листопада/новембра дорога буде закрыта для руху в місцевости Чырна і од крижівкы з ґмінном дорогом до Ізб до границі Чырной і Мохначкы Выжньой, та в днях 18. і 19. листопада/новембра од крижівкы з воєвідском дорогом 981 на долгости ок. 800 м і на одтинку в Перунці. Пропонуваный обізд іде державном дорогом нр 75 і воєвідском дорогом нр 981. Залежно од хвилі термін закрытя дорогы може быти зміненый.