Сумар дня на 15. липця/юлия 2022 р.

Приносиме вам сумар медияльной ґрупы ЛЕМ.фм+ на ден 15. липця/юлия 2022 р.

Новый рекреацийный парк і біциґльова стежка

В Санковій буде новый парк і біциґльова стежка. Зачали реализацию проєкту зміцніня трансграничной спілпрацы в обшыри культурово-природничой спадковины, што має на ціли піднести ефективный і зінтеґруваный рівен схоснуваня ресурсів, а што за тым іде збільшыти туристичну атракцийніст реґіону. Проєкт має дати охорону і розвиток головного потенциялу обшыри погранича, што становит природничу і культурову спадковину, і зміцнити трансграничну партнерску спілпрацу Бобовой, Нижньой Полянкы, Санковой і Стропкова в обшыри спільной охороны, розвитку і промоциі дідицтва. В рамках проєкту в Ґміні Санкова зрыхтуваный буде рекреацийный парк обнимаючый природничу част, в тым ґратя сенсоричного досвіду в Сярах і біциґльова траса, што лучыт обєкты UNESCO на терені ґміны Санкова – костел св. Филипа і Якова в Санковій і церков Покровы Пресвятой Богородиці в Рыхвалді. Цілковитый кошт проєкту то більше як 2 млн евро. 85% коштів покрыє Европейскій Фонд Реґіонального Розвитку. Завершыти роботы плянуют 30. квітня/апріля 2023 р.

Проблемы з водом з причыны сухот

Актуальне сухє літо, як і пару попередніх, примусило жытелів русиньского села Радван над Лабірцьом, меджелабірского окресу, проглубляти студні. Як про аґентуру TASR повіла старостка села Яна Свічынова, при єднакым стані климату в слідуючых роках то не буде мусіло быти рішыньом. Ситуация з рока на рік є гірша, а люде боят ся о воду. В Радвани над Лабірцьом неє публичного водоводу, жытелі сут сказаны на власны студні. Стараня выбудувати сельскій водовод мал уж попередній староста. Бесіды зо Східньословацком Водном Компанійом скінчыли лем коло проєкту на початок процесу, пак м.ін. з фінансовых причын од того одступили. Водовод кінчыт ся тепер в Грабовци над Лабірцьом, котрый є десят кілометрів од Радвани. Як бы сухє літо мало продолжати, то на осін, подля старосткы, може быти в селі «катастрофа».

Літо в театрі

Тырват третя едиция театрального проєкту «Літо в театрі» в Ґмінным Осередку Культуры Устя Рускє. Од 4. липця/юлия ґрупа діти в віку 8-11 років проводит вакациі, граючы в театр, рыхтуючы спекталь і познаючы таємниці выступуваня на сцені. Берут они участ в проєкті, в часі якого рытуют выняткове музичне представліня. Аранжация вершів Яна Бжехвы то не лем стріча з позачасовом поезийом, але предовшыткым креативна робота діти, театральных інструкторів і музиків, з котрыма реализуют спектакль діти. Показ результатів варштатовой роботы одбуде ся 16. липця/юлия о 18.00 год. на Сцені під Деревом в Устю Рускым. «Літо в театрі» то проґрам Театрального Інституту ім. Збіґнєва Рашевского, што фінансуваный єст з середків Міністерства Культуры і Нацийональной Спадковины.

Досліджыня мікробіоты кышок

Дослідникы з Варшавского Медичного Університету і Варшавского Університету реализуют проєкт, якій тыкат мікробіоты кышок. Інтересуют іх квестиі біолоґічной і культурово-языковой ріжнорідности і іх звязкы. Досліджыня обнимат баданя чловечого мікробіому кышок в окремых языково ґрупах і вельоязычных ґрупах. Принимают они, же окремы культурово і языково ґрупы, зо взгляду на окреміст і дбаня о сохраніня традицийных культуровых практик, мают «здоровійшу» мікробіоту кышок, в результаті чого можут быти ліпшыма донорами для трансплянтациі мікробіоты. Проєкт закладат інновацийне досліджыня культурового дідицтва і схоснуваня його потенциялу на потребы сучасной медицины і медичной біотехнолоґіі. Цілый дослідничый процес складат ся з трьох етапів. В тым, першым етапі просят Лемків (якы мают од 18 до 50 років) выполнити коротку анкєту, што тыкат стилю жытя, достоменности і локального природничого знаня. Мотузок до анкєты находит ся гев.