Сумар дня на 15. квітня/апріля 2020 р.

Приносиме вам сумар медияльной ґрупы ЛЕМ.фм+ на ден 15. квітня/апріля
2020 р.

I в Польщы будут «одморожати економіку»

Міністер Здоровля Лукаш Шумовскій заповіл на антені радия RMF FM, што од 19. квітня/апріля будут «одморожати економіку». Од будучой неділі має ся збільшыти ліміт осіб, якы можут находити ся в склепах, мают быти люзуваны рестрикциі звязаны з услугами. Уряд плянує одкрыти фризиєрскы і косметичны сальоны і склепы з облечыньом, але фурт треба буде тримати дистанс, а клієнты будут мусіти носити масочкы, або інче, што закрыє ґамбу і ніс, згідні з розпоряджыньом, котре од четверга вводит обовязок закрываня ґамбы. Найпевнійше тіж од неділі отворят лісы і нацийональны паркы, буде мож свобіднійше переміщати ся по місті. Єдночасно міністер уж заповіл, што тогорічны вакациі будут інчы як дотеперішні, а діти можут ся попращати з таборами ци колоніями, на разі уряд стоіт на думці, што не повинны быти орґанізуваны. Конечны рішыня што до зменшыня рестрикций будут підняты заран.

Грошова поміч для підриємців на утриманя етатів

В найблизшым часі Заряд Малопольского Воєвідства довершыт плян підпертя для підприємців. Плянуют утримати ґенеруваны в фірмах етаты. Вступны усталіня бесідуют о середках высокости 9 тис. зл на каждый декляруваный до утриманя цілый етат. Підпертя буде презначене для вшыткых фірм, котры нанимали од 1 до 49 робітників в полным часовым вымірі. Приняли тіж вступны заложыня, што аплікувати можут лем тоты компаніі, в котрых обороты впали о што найменьше 50% в звязку з епідемічном ситуацийом. Вступный гармоноґрам робіт закладат, што рыхтуваня детальных заложынь та можности електронічно аплікувати буде можливе в найблизшых тыжнях. На борбу з коронавірусом та лагоджыня наслідств епідеміі для малопольской економікы самоуряд воєвідства передал 325 млн зл. Грошы походят з Реґіонального Операцийного Проґраму. Будут выданы на підпертя трьох секторів: медичного, підприємства та фінансовой лябільности.

Дале не знатя, што зо сапярньом смітя в Ґорлицях

Будова і інсталяциі до термічного переформлюваня смітя плянувана через фірму Емполь в Ґорлицях зас є невідома. Службы малопольского воєвідства згодили ся тепер з рішыньом повітового староства в Ґорлицях і признали му рацию в справі незатвердженого будовляного проєкту і выданя позволіня на будову спалярні. З рішыня воєводы можут быти задоволены противникы той інвестициі, подля котрых пялнуваня через Емполь спалярня то обєкт о вельо більшый як потребы реґіону, як подає Люцина Ямро, радна міста Ґорлиці. Подля ней звожыня смітя з далекых обшыри міста і повіту буде великым обтяжыньом уж тепер закоркуваного міста. Згідні з пляном спалярня мала бы перерабляти 100 тис тон смітя, 70% уж тепер громадит фірма Емполь з ґорлицкого реґіону, решту треба бы довезти – в перерахуваню буде то коло 12 25-тоновых тягарівок. Рішыня воєводы є фінальне, але фірмі Емполь прислугує право внести скаргу до Воєвідского Адміністрацийного Суду. Марек Цвіклік, одповідальный в Емполю за тоту інвестицию, бесідує, што фірма іщы не підняла в тій справі рішыня.

КТ і Heinz документуют м.ін. русиньскы традициі

Карпаторусиньскє Товариство довєдна з Центром Істориі Heinz роблят над документацийом того, як жытелі західньой Пенсильваніі зберігают великодні звыкы. Цілю є позберати материялы з першой рукы, значыт ходит о архівальны награня зо самого святкуваня і рыхтувань до него або о награня ци знимкы, котры будут упамятняти надходячы свята. Каждый хто має такы материялы і хоче ся нима поділити, прошеный є переслати іх на е-майль pres@c-rs.org до Мариян Сивак, ведучой Карпаторусиньского Товариства.