Сумар дня на 15. червця/юнія 2023 р.

Приносиме вам сумар медияльной ґрупы ЛЕМ.фм+ на ден 15. червця/юнія 2023 р.

Одбыл ся Лемківскій Пікнік в ЗША

В неділю, 11. червця/юнія проходил в Гартсдейль (штат Ню Йорк) Лемківскій Пікнік з нагоды Русаля, якій орґанізувал Карпаторусиньскій Америцкій Центр «Lemko Hall». Пікнікы, якы од парох років орґанізуют еміґрацийны діячы, сут продолжыньом давных пікніків, котры рыхтувала перша еміґрация з Лемковины. Подія каждый рік притігат вельох любителів лемківской культуры і тых, што наново одкрывают своє походжыня.

Памят о Духновичу і Павловичу

В найблизшу неділю, 18. червця/юнія в русиньскым селі Біловежа на Пряшівщыні одбудут ся подіі посвячены двом нашым Будителям – Духновичови і Павловичови. Подіі зачнут ся о 13.00 год. од положыня квітя під памятниками Александра Духновича і Александра Павловича. Пак пройде сельскій хоровід, а о 14.00 год. зачне ся культурный проґрам на ареалі сельского уряду в Біловежы. Выступлят м.ін. PUL’S з Пряшова, Варвінок з Камюнкы, Сестры Ковачовы ци Біловежанка. Село Біловежа каждый рік памятат на найбільшых з нашых Будителів. Отці духовны Духнович і Павлович служыли перед роками в місцевій грекокатолицкій парохіі.

В Пряшові прошол Фестіваль Духовных Пісен

Як подал Інформацийный Центр Пряшівской Архієпархіі, в грекокатолицкым катедральным соборі в Пряшові вчас посліднього вікенду звучали духовны пісні візантийского обряду в інтерпретациі храмовых хорів. Хоры зышли ся в Пряшові в рамках 32. річника Фестівалю Духовных Пісен. Подія зачал ся в пятницю 9. червця/юнія літургійом, котру одслужыл владыка Петро Руснак. В суботній части брало участ сім хорів. Як першый выступил домашній катедральный хор св. Йоана Крестителя, якый в соборі співат уж пятдесят років. Наймолодшый – Хор свв. Семочысленників з Собранец, што был основаный 5 років тому, выступил як другій. Пак продолжали м.ін. Хор св. Йосифа при Базилиці Св. Духа в Михалівцях ци Стаурос з грекокатолицкой парохіі Воздвижыня Честного Креста в Пряшові на Сідлиску Секчов. Пісньом «Буди імя Господнє» в обробці композитора Димитрия Бортняньского в інтерпретациі вшыткых выступуючых хорів закінчыл ся суботній концерт. Недільна част фестівалю продолжала співом хорів на святых літургіях в пряшівскых храмах.

Посвячыня новой церкви в Слубіцах

На обшыри вроцлавско-щеціньскпой єпархіі ПАПЦ посвячено нову православну церков. 10. червця/юнія така подія прошла в Слубіцах (любушскє воєвідство). Архієпископ Юрий вєдно з другыма священнослужытелями посвятили новый храм Покровы Пресвятой Богородиці. Слубіцку парохію покликано 22. мая 2006 р. стараньом першого пароха о. Антония Габуры і по благословліню архієпископа Єреміі. Нововысячена церков навязує до ХІ-вічной церкви Покровы Пресвятой Богородиці на Нерли. Пляц під будову храму передали власти міста Слубіце. Прихожанами парохіі сут вірны ріжных нацийональности. Теперішнім парохом єст о. Михал Коваль, якій был одзначеный ордером св. Мариі Магдалины. Окрем священника ордерами были одзчанеы церковный староста і вірны заанґажуваны в парохіяльне жытя слубіцкой громады.