Сумар дня на 14. жолтня/октобра 2021 р.

Приносиме вам сумар медияльной ґрупы ЛЕМ.фм+ на ден 14. жолтня/октобра 2021 р.

Уж тот вікенд Лемківска Творча Осін

Митрополиті Йосифови Сембратовичови, в 200. річницю народжыня, буде посвячена найблизша Лемківска Творча Осін. ХХІХ едиция стріч творців лемківской літературы пройде уж в тот вікенд – 16. і 17. жолтня/октобра, в двох місцях – в Креници, і традицийно, в Рускій Бурсі в Ґорлицях. В проґрамі є м.ін. доповід про митрополиту галицкого і архієпископа львівского Йосифа Сембратовича, одданого народови і Церкви Русина, котрый остатні рокы свойого жытя провюл на выгнаню в Римі. Про його особу бесідувати будут др габ. Олена Дуць-Файфер та Петро Мурянка, котрый розповіст іщы про поету Івана Горощака в 30. річницю його смерти, автора м.ін. обшырного тритомового твору «Прощай моя Лемковино». В дальшій части Осени запрезентуют ся творці русиньского писаного слова, як і тоты, котры пропаґуют лемківску літературну творчіст в чужых языках. На конец з концертом выступит Сусанна Яра в акомпаніяменті контрабасисты і перкусисткы. Початок стрічы в Креници в Музею Никыфора в суботу о 18.00 год., а в неділю в Рускій Бурсі о 15.00 год.

Ци мадярска меншына достане більше?

Мадярскiй Oбщественный і Kультурный Союз на Словациі – Csemadok міг бы доставати каждый рік 300 тис. евро з ресорту культуры. Запропонувал то депутат Дьордь Дімеші, котрый до Нацийональной Рады Словацкой Республикы подал пропозицию закону о фінансовій підпорі для Csemadok. Депутат тым законом хоче вытворити леґіслятивны рамкы ґаранциі реґулярной шторічной фінансовой дотациі з розрахунковой пулі Міністерства Культуры СР про тоту мадярску культурну інституцию. Кєд бы пропозиция депутата перешла позитивно голосуваня, был бы то меншыновый выняток на Словациі. Головно зато, же такы розвязаня бы ся односили товды лем до єдной орґанізациі і лем до єдной нацийональной меншыны на Словациі, примірово і Русины могли бы так само жадати на підпору своіх просторів ци професийональных працівників, так як жадат того мадярска меншына.

ХІV Стрічы Трьох Поколінь з Лемківском Культуром

Дальшом осінньом подійом, яку орґанізує Кружок Стоваришыня Лемків в Пшемкові, буде ХIV едиция Стріч Трьох Поколінь з Лемківском Культуром. Тогорічны стрічы одбудут ся в суботу, 6. листопада/новембра, в Пшемківскым Осередку Культуры. Не єст іщы знаный детальный проґрам, але вступні знатя, што запрезентуют ся напевно фольклорны ансамблі, в тым ґрупы, якы быти може придут на чужыну з Лемковины. Вчас каждой стрічы окрем выступів одбывают ся презентациі найновшых выдань Стоваришыня Лемків, додатково придбати мож книжкы і часописы на місци. Подія єст радо принимана не лем лемківскыма жытелями Пшемкова і околиц, але і польскыма сусідами.

Музеі ґорлицкой землі в проґрамі «Познай Польщу»

Перед даякым часом зачал ся проєкт Міністра Едукациі і Наукы пн. «Познай Польщу», в рамках котрого мож старати ся о дофінансуваня на шкільны прогулькы до місц, якы нашли ся в міністерияльным списку. А находят ся на ним і обєкты з ґорлицкого реґіону. Сут то Скансен Погіряньского Села ім. проф. Райфнуса, Реґіональный Музей ПТКТ ім. Лукасєвича та Скансен Нафтового Промыслу Маґдалена. В рамках проґраму признаваны сут цільовы дотациі для публичных і непубличных шкіл в высокости 5, 10 або 15 тис. зл.