Сумар дня на 14. вересня/септембра 2023 р.

Приносиме вам сумар медияльной ґрупы ЛЕМ.фм+ на ден 14. вересня/септембра 2023 р.

ІІ Лемківскє Співаня

В минулу суботу, 9. вересня/септембра в селі Высока коло Рудной на Нижнім Шлеску проходила подія під назвом ІІ Лемківскє Співаня. В стрічы, яка одбывала ся в прекрасных обставинах природы, взяли участ місцевы жытелі, але і приіздны Лемкы з другых части чужыны. Подія зачала ся походом і спільным положыньом огня під ватрочком. Пак презетнували ся лемківскы, польскы ансамблі, але і ґрузиньскій колектив. На подіі присутный был православный владыка вроцлавско-щеціньскій архієпископ Юрий. Подія была орґанізувана ґміном Рудна, але предовшыткым жытелями Высокой, котрыма сут в великым чыслі Лемкы. Шолтыском села є Ірена Габура. Выступували м.ін. ансамбль діючый при Кружку Стоваришыня Лемків в Ґавронках – Розтока, Дамир, Крамбабуля ци Вороны. На присутных здає ся найвекше вражыня зробил ансамбль з Ґрузиі, якій дал такой пілторагодинный концерт.

Лемківскы кандидаты до Сойму

15. жолтня/октобра будут проходити парляментарны выборы. Загальнопольскы комітеты оголосили уж своі спискы кандидатів, серед котрых нашли ся і представникы лемківской меншыны. Свій старт на посаду посла на Сойм Польской Республикы оголосил теперішній ведучый Музею Лемківской Культуры в Зындрановій, Богдан Ґоч. Кандидат буде статртувал з комітету «Третя дорога» на Підкарпатю. Другым кандидатом, якій бесідує о своім лемківскым походжыню, є Ян Войтович, теперішній віцестароста польковицкій, якій так само выстартує зо списку «Третьой дорогы», лем же на Нижнім Шлеску зо свого материньского округу. Войтович был присутный на тогорічній Лемківскій Ватрі на Чужыні в Михалові. Зближаючы ся выборы то добра нагода, жебы звідати кандидатів о іх пляны на меншынову діяльніст. В найблизшых днях будеме старати ся дати ім пару звідань. О одповідях будеме інформувати.

Соспільны архівы. Примір Руской Бурсы

Уж заран др Аркадий Вєнх z Інституту Істориі Ягайлоньского Університету поділит ся своім знаньом на тему соспільных архівів з жытелями Перемышля. Подія одбуде ся в рамках циклю «Архівы очами хоснувателів» спілорґанізуваного Товариством Приятелів Наукы ім. Казімєжа Мариі Осіньского в Перемышли і Стоваришыньом Польскых Архівістів Одділіня в Перемышли. Партнерами той цікавой прелекциі сут Державны Архівы і Державный Архів в Перемышли. Прелеґент буде оповідал о тзв. соспільных архівах, значыт ініциятивах, якы родят ся оддільні. Спомне прото і о діяльности Стоваришыня Руска Бурса в Ґорлицях, при котрых діє як раз соспільный архів. На архів ґорлицкой бурсы складают ся м.ін. материялы по Єжы Турі і Барбарі Тондос та Тадеушу Бохеньскым. Як раз діяльніст той лемківской орґанізациі буде подавана як примір і меншыновой діяльности в обшыри охороны цінных історичных волюмінів. В просторах Руской Бурсы зберігат ся більше архівів – спомнути хоц бы іщы о материялах в Ізбі Памяти Івана Русенкы ци материялах по основателю радия лем.фм – Богдані Ґамбалю.

Вроцлавскы варштаты іконописаня

Як інформує сайт вроцлавско-щеціньской єпархіі ПАПЦ, з благословліня архієпископа Юрия рушыли записы до 10. едициі варштатів іконописаня, котры зачнут ся 23. жолтня/октобра і потырвают такой через тыжден, до 28. жолтня/октобра. Варштаты будут одбывати ся во Вроцлаві, в Каменици під Ангелами. Чысло місц є ограничене, прото орґанізаторы заохочают до скорых записів. Вступне выносит 800 зл. Орґанізатором подіі є вроцлавскє Православне Стоваришыня ім. Св. Апостолів Петра і Павла.