Сумар дня на 14. січня/януара 2021 р.

Приносиме вам сумар медияльной ґрупы ЛЕМ.фм+ на ден 14. січня/януара 2021 р.

Річник Руской Бурсы 2020

Заявляме, што вышол Річник Руской Бурсы за 2020 рік, а вы можете го помалы придбати. Шістнадцете выданя Річника посвячене єст темі «Лемківского/русиньского меджевоєнного періоду» – часу найдале посуненой лемківской еманципациі. Річник зрыхтувала як головный редактор дальшый раз др габ. Олена Дуць-Файфер. Посвяченый є він in memoriam Богданови Ґамбальови. Припомнийме, што од 2017 р. Річник Руской Бурсы єст моноґрафічном публикацийом, што значыт, же не односит ся він до точной річниці, лем oповідат за деякій період загальні – як все барз важный для лемківской істориі. В посліднім выданю Річника находят ся науковы статі авторства Богдана Горбаля, Анджея Зємбы, Олены Дуць-Файфер, Даміяна Новака ци Павла Роберта Маґочія. Річник чыслит близко 300 стран. Выдавцьом окрем Руской Бурсы в Ґорлицях єст Академіцка Книгарня в Кракові. Книжка была выдана згідно зо вшыткыма принципами науковых публикаций. Річник Руской Бурсы 2020 был выданый завдякы дотациі МВСіА та дотациі Міністра Культуры і Нацийональной Спадковины, якы походят з Фонду Промоциі Культуры.

Книжка остала выдана завядкы дотациі Міністра Внутрішніх Справ і Адміністрациі та з фінансовом підпором Міністра Культуры і Нацийональной Спадковины з фонду Промоциі Культуры. Річник Руской Бурсы 2020 мож стягнути за тым мотузком.

В неділю Ден Русинів Сербіі

В найблизшу неділю, 17. січня/януара, войводиньскы Русины будут празднувати своє нацийонайльне свято – Ден Русинів Сербіі. Орґанізатором штырнадцетого уж празднуваня русиньского торжества в Сербіі єст орґанізация під назвом Завод за культуру войводиньскых Русинів. В звязку з епідемічном ситуацийом празднуваня будут проходити головно через трансмісиі онляйн поєдных подій. Празднуваня будут одбывати ся з підпором Нацийонального совіту русиньской нацийональной меншыны, Радийо-телевізиі Войводины, Проґраму за русиньскій язык та грекокатолицкой парохіі св. св. апостолів Петра і Павла в Новым Саді. Подіі зачнут ся як раз о 18.00 год. благодарном Службом Божом в реченій парохіі, котра буде так само трансмітувана в сіти Фейсбук. О 19.00 год. одбуде ся культурный проґрам під назвом Руснакы в Новым Саді і ретроспектива. Так само о 20.00 год. в Радийо-телевізиі Войводина будут трансмітуваны проґрамы про новосадскых Русинів і скорочыня найліпшых выступів, якы дотля проходили в рамках Дня Русинів. При тым на третім проґрамі медий буде вказана полна версия найліпшых выступлінь. Окрем телевізиі і радия, вшыткы тоты подіі будут трансмітуваны на Фейсбуку і Ютуб. Деталі найдете і на нашым портали.

Онедолга два засідня соймовой КНіЕМ

В найблизшых днях одбудут ся два засіданя соймовой Комісиі Нацийональных і Етнічных Меншын. Перше з них одбуде ся в понедільок, 18. січня/януара. Засіданя зачне ся о 16.30 год. Темом стрічы буде розсмотріня інформациі Міністра Внутрнішніх Справ і Адміністрациі на тему діянь підниманых в 2019-2020 рр. через полномічных воєводів до справ нацийональных і етнічных меншын. Другє засіданя заплянуване на будучый тыжден одбуде ся в пятницю, 22. січня/януара. Буде оно посвячене розсмотріню інформациі презеса Головного Статистичного Уряду на тему заложынь і методикы тогорічного Нацийонального Спису Населіня в обшыри звідань о нацийональніст і рідный язык. Початок о 8.30 год. Оба засіданя будут трансмітуваны онляйн на соймовым вебсайті.

На щестя, на здравля, на тот Новый Рік!

А на конец хочеме передати вшыткым вам новорічны желаня з нагоды першого дня Нового 2021 Рока за юлияньскым календари. Вчера святкували сме Маланку, жебы о пілночы привитати Новый Рік. Як раз першый ден січня в юлияньскым календари то памят св. Василия, так што і вшыткым Василям – на многы і благы літа. Витаючы «старый» Новый Рік желаме предовшыткым здоровля, котре фурт мусиме зміцняти в добіі тырваючой пандеміі. Най же цілый 2021 рік, і тот григоряньскій і юлияньскій, буде про нас о вельо ліпшый, як старый. Вшыткого найліпшого, желат радийо Лем.фм і Стоваришыня Руска Бурса в Ґорлицях.