Сумар дня на 14. серпня/авґуста 2024 р.

Приносиме вам сумар медияльной ґрупы ЛЕМ.фм+ на ден 14. серпня/авґуста 2024 р.

Новосільскій дома…

Юрий Новосільскій, знаменитый маляр, рисовник, сценоґраф, але тіж теолоґ, а для вельох – найвыдатнійшый сучасный маляр ікон, «вертат домів». Як раз під такым названьом «Юрий Новосільскій – поворот домів» буде уж о тыжден вказувана выстава робіт Новосільского в Ґалериі Штукы Двір Карвациянів і Ґладышів в Ґорлицях. То першый раз, коли так шыроко презентувана буде творчіст того артисты так близко його рідной землі – лемківской Одреховой, одкале был отец Новосільского. Краєвиды Лемковины з єй архітектуром мож стрітити на вельох образах артисты. Експозиция вказувана в Ґорлицях буде ся складала з 24 малярскых творів. Як подає Анна Будзалек, кустош в Нацийональным Музею в Кракові, «штука Юрия Новосільского заберат публику в особливу духову подорож в реґіоны містицизму, в світ переполненый есхатолоґійом і трансценденцийом. А сам артиста, як і його творчіст фурт остают таємницьом, неможливом до полного зрозумліня, може зато сут так захоплюючы». Выставу в Дворі Карвациянів буде мож обзерати до 13. жолтня/октобра тр.

Конференция про карпатску обшыр

В рамках стріч з циклю «Люде Свободы Европы Карпат», на обшыри Арборетум і Закладу Фізийоґрафіі в Цісовій в ґміні Красічын, одбыла ся конференция пн. «Карпаты – горы, котры лучат». В подіі участный был віцемаршалок підкарпатского воєвідства Пьотр Пільх, посол Марек Кухціньскій, директор Підкарпатского Ансамблю Воєвідскых Пляцівок Кристина Врублевска, місцевы самоурядовці і діячы, што звязаны з карпатскым еврореґіоном. Головном темом конференциі было: «Люде і природа. О спілпрацы карпатского макрореґіону і Підкарпатя». Присутны дискутували о ініциятиві Европа Карпат, то цикль медженародных конференций, а тіж о господарчых і культуровых перемінах в Карпатах. О спілпрацы карпатского макрореґіону бесідувал Презес Стоваришыня Карпатскій Еврореґіон Давид Ласек. Своі презентациі мали представникы Університету Европа Карпат ци Народного Університету в Кузміні. Конференция в Цісовій прошла в рамках Урядового Проґраму Розвитку Громадяньскых Орґанізаций. Орґанізатором было Перемышльскє Культурне Товариство.

Компостовникы для хытелів ґміны Устя Рускє

Війт Ґміны Устя Рускю інформує, што ґміна приступила до проґраму Малопольского Воєвідства в обшыри заґарантуваня ґаздівкам компостовників. В звязку з признаным дофінансуваньом ґміна закупила 73 компостовникы, котры будут дармо роздиспонуваны серед властителів ґаздівок на основі умів переданя. Заінтересуваны властителі будинків прошены сут выполнити і зложыти внесок в Уряді Ґміны Устя Рускє або в Закладі Комунальной і Мешканьовой Господаркы в Высовій. Внесок мож зложыти тіж посередництвом електронной почты на майльовый адрес ґміны або через систем ePUAP в терміні до 30. серпня/авґуста.

Чуваня в Лопєнці

Днес вечером в церкви в Лопєнці пройде нічне чуваня в храмі перед іконом Лопєньской Божой Матери. Кульмінацийным пунктом буде чуваня, котре зачне ся о 19.00 год. Буде то екуменічне богослужыня з участю римокатолицкых, грекокатолицкых, православных і польскокатолицкых священників.

О влияню мамы Варголя на єй сына…

Выдавництво Уністерситету в Пітсбурґу рыхтує на листопад/новембер того рока печатати книжку професор Елейн Русинко, котра од років занимат ся досліджаньом русиньской літературы. Од десятьох років проф. Русинко занимат ся і особом Юлиі Варголь – мамы Енді Варголя, провірує і студиює вшыткы звязаны з ньом артефакты з архіву Музею Енді Варголя в Пітсбурґу. Ефектом той роботы буде моноґрафія з назвом «Матір Енді Барголя. Жена за художником», котру печатат як раз пітсбуржскій університет. Нову книжку коментує Богдан Горбаль, робітник нюйоркской бібліотекы – пише што: «Русинко зручно і чутливі оповідат єй жытьову історию од Миковой через Пітсбурґ аж по Ню Йорк, при чым дає вываженый огляд, котрый не єст типовым портретом». Хоц вельо біоґрафів Варголя уж давно признало, што мати Варголя мала вызначне влияня на його жытя і творчіст, то істория Юлиі Вархолы дотепер не была іщы представлена. Плянувана до друку книжка дополнит тот брак.