Сумар дня на 14. серпня/авґуста 2023 р.

Приносиме вам сумар медияльной ґрупы ЛЕМ.фм+ на ден 14. серпня/авґуста 2023 р.

Неґативна опінія ґміны Крампна для пляну охороны Нацийонального Маґурского Парку

Радны ґміны Крампна на липцовій сесиі ґміны неґативні заопініювали 20-літній плян охороны Нацийонального Маґурского Парку. Спосеред 13 присутных радных лем єден оповіл ся за представленым проєктом. Крампна єст єдном з семох ґмін, в котрых находит ся парк, і першом, котра заопініювала актуальный плян охороны. Як подают радны, справы парку сут особливо важны для ґміны, зато же аж 65% єй обшыри находит ся в териториі парку, а наступных 25% становит отулину, додатково ціла ґміна єст обнята охороном Natura 2000. Першу версию 20-літнього пляну охороны представлено в 2016 р. і од того часу власти парку і ґмін старают ся найти компроміс медже охороном а добром жытелів. Хоцкі опінія ґмін не єст рішуча, то єст брана до увагы Міністерством Середовиска і Климату при рішаню о реализациі проєкту або одосланю го до поправы і консультациі. Радным Крампной не сподабали ся м.ін. записы о збільшыню обшыри обнятой стислом охороном з 12% до близко 40%, закрытя можливости будуваня на ділянках находячых ся в парку ци заказ будуваня маштів мобільной сіти в отулині. Додатково домагают ся приверніня пути з Ожынной до Гуты Поляньской та одкрытя новых туристичных пути в парку.

Термін матур 2024 не буде колідувал з другым дньом Великодня?

Тыжден тому інформували сме, што спілведучый Спільной Комісиі Уряду та Нацийональных і Етнічных Меншын Григорий Куприянович скєрувал писмо до директора Центральной Еґамінацийной Комісиі в справі терміну матурального еґзаміну 2024 в звязку з потенцияльном колізийом термінів другого дня Великодня подля юлияньского календаря і першого дня матурального еґзаміну. Квестия тота єст барз важна для меншыновых соспільности в Польщы, котры хоснуют в своім реліґійным жытю юлияньскій календар, м.ін. для вірных православной Церкви. Директор Центральной Еґзамінацийной Комісиі, Марцін Смолік, в своій одповіди задеклярувал, што при рішаню o найблизшых термінах матур будут брати до увагы потребы матуристів хоснуючых юлияньскій календар в реліґійній части жытя.

Лябораториq Світла

В Ґорлицях хотят побудувати науково-історичный центр Лябораторию Світла. Закля што місто має лем концепцию і жде на розвязаня конкурсу на проєкт музею. За бургомайстром Ґорлиц, Рафалом Кукльом – місто єст колыском нафтового промыслу, зато в новым проєкті власти міста хотят не лем вказати світло в новій, цікавій одслоні, але тіж навязати до істориі реґіону і Ігнатия Лукасєвича, а вшытко при захованю модерной формы. Пляново лаборатория найде ся при рынку і помістит постійну, інтерактивну выставу посвячену Лукасєвичови та модерны варштатовы салі, де мож буде почути ся як хімік ци науковец – цілю єст заанґажувати одвиджаючых до познаваня наукы.

«ETNO Бєщады»

Ґмінный Центр Культуры і Еколоґіі в Тисній просит до участи в фестівалю культуры Карпат  «ETNO Бєщады». Подія пройде 15. і 16. серпня/авґуста в Тисній. В пляні на першый ден фестівалю в віторок находит ся одкрытя выставы «Світ Лемків і Бойків» і прелекция о штоденным жытю та святкуваню в Бєщадах. Другого дня мож буде м.ін. взяти участ в конкурсі знань. Пройдут тіж ріжного рода варштаты, м.ін. карпатского взірництва, співаня карпатскых пісен ци гончарства. Не бракне і концертів, на сцені мож буде почути Оркєстру Св. Миколая і ансамбль Вернигора.