Сумар дня на 14. мая 2021 р.

Приносиме вам сумар медияльной ґрупы ЛЕМ.фм+ на ден 14. мая 2021 р.

Плян розвитку реґіону Мураньской Полонины

Як подала аґентура ТАСР, в минулу пятницю, 7. мая, прошла стріча державного секретаря ресорту жывотного оточыня Михала Кіча з представниками самосправ, туристичного руху і Лісів Словацкой Республикы. Секретар поінформувал на ній, што Міністерство Жывотного Оточыня Словацкой Республикы насадило реализацию пляну розвитку на Мураньскій Полонині, котрый поможе реґіонови при його трансформациі. На пілотажовы проєкты розвитку мягкой туристикы в Нацийональным Парку Мураньска Полонина, але і в Нацийональным Парку Полонины, якій ся находит в русиньскым реґіоні, має быти переданых 16 млн евро. В результаті мают быти вытворены робочы місця, а розвиток мягкой туристикы в реґіоні має і протидіяти вылюднюваню.

В Ліґници выбудуют сервісову галю Нижньошлезской Желізниці

Як подали на офіцийным інтернетовым сайті Нижньошлезской Желізниці, тырвают працы при розбудові теxнічной базы Нижньошлезской Желізниці в Ліґници. Спілка одобрала уж проєкт новой сервісовой галі. Тепер фірма жде на оферты заінтересуваных реализацийом. В новій гали будут ся находити штырі торы долгости 120 метрів і єден на цілорічну, модерну автоматичну мыйню. Як підкрислят Даміян Ставіковскій, председа Нижньошлезской Желізниці, залежыт ім, жебы піднести стандард потягів і комфорт подорожы пасажерів. Інвестиция в сервісовый центр має влинути і на зменшыня коштів сервісовой обслугы табору, зменшыня выкорыстаня енерґіі ци безпечну і ефективну реализацию провіряня і направ та скоршу реакцию на авариі. Початок розбудовы технічной базы єст плянуваный на четвертый квартал того рока. Працы мают быти завершены на початку 2023 рока. Цілковитый кошт інвестициі то близко 45 млн злотых.

«Дубайовы – Анна і єй діти» в Музею Русиньской Культуры

Як інформувала Яна Трущыньска зо Словацкого Нацийонального Музею – Музею Русиньской Культуры в Пряшові, музей рыхтує выставу пн. «Дубайовы – Анна і єй діти». Буде она одкрыта 4. червця/юнія о 16.00 год. Єст присвячена цілій родині Дубайовых, од основателів, Дезидерия і Анны, аж по іх внуків і правнуків. Обнимат выбір з творчости Михала і Ореста Дубайовых, але і особисты річы, оцініня, артефакты і публикациі з творчости цілой родины. Выстава буде одкрыта для одвиджаючых до 4. жолтня/октобра тр. Більше про выставу і родину Дубайовых прочытате в статі на нашым портали.

Новый видоковый тарас в Креници

На Креницкій Яворині выбудуют видоковый тарас. Туристы будут мочы з плятформы на найвысшым верху Сандецкого Бескіду обзерати м.ін. панораму Татр, креницку видокову вежу і стежку в коронах дерев, сходы і заходы сонця. Видоковый тарас на Яворині долучыт до такых атракций як популярна ґондольова желізниця, лыжны трасы, ци природничо-едукацийны стежкы.