Сумар дня на 14. лютого/фебруара 2022 р.

Приносиме вам сумар медияльной ґрупы ЛЕМ.фм+ на ден 14. лютого/фебруара 2022 р.

Становиско СКУтНіЕМ в справі розпоряджыня зменшаючого чысло годин вчыня німецкого як меншынового языка

Своє становиско в справі зменшыня выміру годин вчыня німецкого як языка меншыны подала меншынова сторона Спільной Комісиі Уряду та Нацийональных і Етнічных Меншын. Як пишут, з 1. вересня/септембра тр. введены будут в Польщы два стандарды вчыня меншыновых языків, єден для німецкой і другій для дальшых меншын. Єст то для них рівнозначне з ріжным трактуваньом державом громадян находячых ся в тій самій ситуациі і веде до дискримінациі з огляду на нацийональніст учеників належачых до німецкой меншыны. Записы того акту сут незгідны з Конституцийом, законом о нацийональных і етнічных меншынах та реґіональным языку, як і ратифікуваныма Польщом медженародныма трактатами. Особливый непокій меншыновых соспільности родит одкликаня ся в тій ситуациі до принципу симетриі політикы державы до своіх громадян од діянь інчых держав, што ся не містит в стандардах демократичной державы і нарушат громадяньскы права меншын. Підкрисляют, же розпоряджыня уж выкликало шырокы і неґативны реакциі на медженародным форум. Додают, же в тій ситуациі поминена была роля Комісиі. Апелюют до власти о зміну дискримінуючых переписів. Votum separatum до реченого становиска зголосил представник ормянской меншыны.

Розпоряджыня незгіне з правом і подля Конференциі Амбасадорів Польской Республикы

Становиско в справі розпоряджыня зменшаючого чысло годин вчыня німецкого як меншынового языка подала 10. лютого/фебруара і Конференция Амбасадорів Польской Республикы. Звертают в ним увагу на важнійшы аспекты назгідности з правом, особливо медженародныма законами. Пишут, же в очывидный спосіб єст то діяня, якє служыт выборчым інтересам правлячой в Польщы коаліциі, а не польскым середовискам в Німцьох. Не єст оно згідне з пересланьом Трактату з 1991 р. та з теперішніма стандардами охороны нацийональных, етнічных і языковых меншын.

Концерт в річницю смерти Юрия Новосільского

Музей Ікон в Варшаві просит на концерт церковной музикы в 11. річницю смерти Юрия Новосільского. «Гымны і пісні Православной Церкви, похоронны і за помершых» заспіват мужскій ансамбль церковной музикы Катапетасма, під дириґентуром Лукаша Гайдучені. Концерт одбуде ся в музейній каплици при ул. Лелеховскій 5, в неділю 20. лютого/фебруара о 19.00 год.

Закрыты шлякы в ґорлицкым реґіоні

Припоминаме о часовым закрытю некотрых туристичных шляків в ґорлицкым реґіоні. З огляду на плянуваны працы в обшыри лісовой господаркы, до кінця марця тр. закрыты будут синій шляк PTTK – Маластівска Маґура на одтинку в Лісництві Рыхвалд та част шляку «Сніжны трасы през лісы» в Лісництві Крива. Так само до кінця марця тр. частично закрытый буде червеный шляк PTTK «Головный Бескідскій Шляк». Запертый буде одтинок «Ждыня-Ясюнка», находячый ся в Лісництві Конечна.