Сумар дня на 14. листопада/новембра 2023 р.

Приносиме вам сумар медияльной ґрупы ЛЕМ.фм+ на ден 14. листопада/новембра 2023 р.

В Ґладышові завершыли част робіт заплянуваных на тот рік при будові новой церкви

Православна Парохія св. Йоана Крестителя в Ґладышові поінформувала, што част робіт заплянуваных на тот рік при будові новой церкви єст уж завершена. Вступні плян на 2023 рік закладал довести інвестицию до сурового закрытого стану, што, зо взгляду на ріжного рода перешкоды і ближучу зиму, не буде зреализуване. Як передал парох о. Ярослав Ґрич, будинок был одповідньо забезпеченый так, жебы перетырвати зиму, а пак на місце будовы зас вернут робітникы. В пляні на будучый рік находит ся докінчыня даху і копул, звінчыня колуп крестами та забезпечыня деревяной конструкциі згідні з вымогами протиогньовых переписів. Сут то пріоритетовы задачы, пак мож буде думати о електричній інсталяциі ци о выпосажыню церкви, особливо о іконостасі. При нагоді припоминаме, што дальше мож підперти будову церкви через інтернетовый сайті zrzutka.pl, наголовок колекты то «Dzieło budowy cerkwi prawosławej w Gładyszowie».

Краса Бескідів презентувана на выставі «Акварелі»

В пятницю 17. листопада/новембра в просторах музею Дворы Карвациянів і Ґладышів пройде вернісаж выставы Данєля Щербы «Акварелі». Данєль Щерба то молодый артиста з околиц Ґорлиц. В своіх працах вказує краєвиды, головні Бескідів, але тіж Татр ци Бєщадів. В особливый спосіб вказує красу Низкого Бескіду з лемківском архітектуром – старыма хыжами ци дервняныма церквами. Окрем малярства занимат ся тіж фотоґрафійом, што мож было обзерати в часі його выставы «Migawki beskitu». Вернісаж выставы «Акварелі» пройде в найблизшу пятницю о 18.00 год. в каштели в Шымбарку. Выстава буде одкрыта до 12. грудня/децембра.

В Польковицях дороговы роботы і зміны орґанізациі руху

В Польковицях тырват перебудова ул. Пшемысловой, з той причыны 15. листопада/новембра плянувана єст зміна ознакуваня, в рамах часовой зміны орґанізациі руху. Од середы част скрижуваня при ул. Пшемысловій і Польній буде закрыта для авт. По закінчыню робіт звязаных з верством підбудовы пройде зміна і будовляны роботы будут ведены на другій части скрижуваня, товды може буде уж переізджати по підбудові. Як передал представник ґміны, такє розвязаня дозволит зрыхтувати ціле скрижуваня до уложыня бітумічной версты, што переложыт ся на скорочыня часу робіт і як найскорше приверніня скрижуваня до руху. Аж і при такым розвязаню плянує ся, што перебудова може тырвати до кінця рока. Місто Польковиці припоминат о триманю безпекы вчас тырваня робіт і дотримуваню новых знаків і сиґнализациі. Інвестиция реализувана єст в рамках проґраму бургомайстра Польковиц Лукаша Пузнєцкого будовы доіздовых доріг до копален «Безпечні на шыхту».

«Wojwodina i jej Rusini. O języku, kulturze i historii Rusinów wojwodińskich»

Інститут Славяньской Філолоґіі Ягайлоньского Університету поінформувал, што вказала ся нова книжка др. Томаша Квокы пн. «Wojwodina i jej Rusini. O języku, kulturze i historii Rusinów wojwodińskich». Публикация має близко 500 сторін і єст поділена на штырі головны части: сучасна Войводина, істория і культура, язык та реґіональна і державна языкова політика на фоні югославяньской, сербской і войводиньской етнополітикы. Доктор Тома Квока єст абсольвентом сербской філолоґіі Ягайлоньского Університету, єст автором многых публикаций на тему Сербіі і Войводины, єст тіж м.ін. спілавтором публикациі «Бесідуйме по лемківскы» і редактором «Лемківскых приповідок і приказкок зо Святковы Великой і околиц». Книжку мож придбати на сайті выдавництва Księgarnia Akademicka.

Фот. Петро Басалыґа